गांधी विचारांची आजही देशाला गरज- खासदार सुप्रिया सुळे:म्हणाल्या- नैतिकतेची लढाई ठामपणे लढण्याचे आवाहन

महात्मा गांधी पुढील पिढीला कळले पाहिजेत,नव्या पिढीला त्यांच्या भाषेत पोहोचवले पाहिजेत.त्यांचा किमान एक गुण अंगात बाणवला पाहिजे.प्रार्थना ही वैय्यक्तिक बाब आहे.तशीच राहिली पाहिजे.आजही देशाला गांधी, विनोबांच्या विचारांची गरज आहे.नैतिकतेची लढाई गांधी विचारांशी ठाम राहून लढली पाहिजे असे मत खा. सुप्रिया सुळे यांनी व्यक्त केले. राष्ट्रपिता महात्मा गांधी पुण्यतिथीनिमित्त महाराष्ट्र गांधी स्मारक निधीतर्फे गुरुवारी विविध कार्यक्रमांचे आयोजन करण्यात आले होते. सामुदायिक प्रार्थना,भजन कार्यक्रम आयोजित करण्यात आले होते.खासदार सुप्रिया सुळे, गांधी स्मारक निधीचे विश्वस्त डॉ. शिवाजीराव कदम, अॅड.अभय छाजेड,एम.एस.जाधव, अन्वर राजन, डॉ.लक्ष्मीकांत देशमुख यांची प्रमुख उपस्थिती होती.महाराष्ट्र गांधी स्मारक निधीचे अध्यक्ष डॉ. कुमार सप्तर्षी हे या कार्यक्रमाच्या अध्यक्षस्थानी होते.खा.सुळे यांनी आणि उपस्थित मान्यवरांनी महात्मा गांधी यांच्या पुतळयाला पुष्पहार अर्पण केला.यावेळी संदीप बर्वे,धनंजय पवार, मोहिनी पवार, बाबालाल बिडीवाले,अभय देशपांडे यांनी भजन गायन केले.सभागृहात प्रा.रमा सप्तर्षी,डॉ.सुनील जगताप,विकास लवांडे, अॅड.स्वप्नील तोंडे, दत्ता बाळसराफ, अॅड.राजेश तोंडे यांच्यासह अनेक मान्यवर उपस्थित होते. खा.सुप्रिया सुळे म्हणाल्या, कॉ. गोविंद पानसरेंचे खुनी जामीनावर सुटलेत. गौरी लंकेश, डॉ.दाभोळकर यांच्या बाबतीत काय झाले,हे आपण पाहिले आहे.श्रद्धा जरूर असावी, अंधश्रध्देने सर्वांचा नाश होतो, महिला मागे पडतात.आमची श्रध्दा पांडुरंगावर आहे,त्यांच्या आणि आमच्या भेटीत आम्हाला मध्यस्थ लागत नाही.'कै.संतोष देशमुख यांच्या मुलीचे अश्रू बघवले नसते. आज काही जणांच्या मांडीला मांडी लावून बसू शकलो नसतो.पक्षाचे विभाजन झाले, हे बरेच झाले.आता सत्ताधारी म्हणतात,आम्हाला नैतिकता शिकवू नका. देशात,राज्यात वातावरण अत्यंत बिघडले आहे.नैतिकतेची ही लढाई सातत्य ठेवून, विचारांशी ठाम राहून लढली पाहिजे. गांधीजींचे न ऐकता शहरात येऊन आपण शहरे बकाल केली आहेत.गांधी, नेहरूंचे सायंटिफिक टेंपर, विज्ञानविचार आचरणात आणले पाहिजेत. संविधानाच्या चौकटीत राहून समाजात बदल घडवले पाहिजेत, असेही खा. सुळे यांनी सांगितले. डॉ.कुमार सप्तर्षी म्हणाले, गांधीजींच्या प्रार्थना हे बीजारोपण आहे.त्यांचे स्मरण हे राष्ट्रपित्याचे स्मरण आहे. गांधीजींनी आयुष्यात कधीही प्रार्थना चुकवल्या नाहीत. गांधींजींचा खून करणारा खुनी पुण्यातील उच्चकालीन असणे हा निव्वळ योगायोग नाही.त्यामुळेच महाराष्ट्रात,पुण्यात गांधी विचार जिवंत ठेवला पाहिजे.गांधी स्मारक निधीची स्थापनाच या उद्देशाने झाली आहे. गांधी विचारांचे बीज आम्ही सांभाळून ठेवले आहे.त्याचा प्रसार करण्याची जबाबदारी सर्वांची आहे. महाराष्ट्रात प्रत्येक पायरीवर नवीन मंत्रीमंडळ एकमेकाशी भांडत आहे. मंत्रीपद, पालकमंत्री पदासाठी चेंगराचेंगरी होत आहे. कारण पालकमंत्री झालो नाही,तर मोक्ष मिळणार नाही,अशी त्यांना भीती वाटते,अशी टीका डॉ. सप्तर्षी यांनी केली.