गुजरातच्या पोलिस कर्मचाऱ्याच्या मुलाचे पुण्यात अपहरण:नदीपात्रात नेऊन 10 हजार रुपये, मोबाईलची लूट; तिघांविरुद्ध गुन्हा दाखल

पुण्यातील कसबा पेठ परिसरात गुजरात पोलिस दलातील अधिकाऱ्याच्या मुलाचे अपहरण करून त्याची लूट करण्यात आल्याची धक्कादायक घटना समोर आली आहे. फरासखाना पोलिस ठाण्यात तिघांविरुद्ध गुन्हा दाखल करण्यात आला आहे. अहमदाबाद पोलिस दलातील अधिकाऱ्याचा मुलगा बलभद्रसिंग जडेजा (वय २५) हा आठवड्यापूर्वी पुण्यात फिरायला आला होता. शुक्रवारी रात्री पोटदुखीमुळे तो सोडा आणण्यासाठी घराबाहेर पडला असता, गावकोस मारुतीजवळ एका दुचाकीस्वाराला थांबवून दुकानाबद्दल विचारणा केली. दुकान दाखवण्याच्या बहाण्याने आरोपींनी त्याला दुचाकीवर बसवले. काही वेळाने आणखी दोघेजण दुचाकीवर आले आणि बलभद्रसिंग याच्या डोळ्यांना पट्टी बांधून त्याला नदीपात्रात नेले. तिथे त्याच्याकडील दहा हजार रुपये आणि मोबाईल हिसकावून घेतला. आरोपींनी अधिक पैशांची मागणी केली आणि त्याच्या चुलतभावाशी संपर्क साधून पैशांची मागणी केली. मात्र चुलतभावाने पैसे देण्यास नकार दिल्यानंतर आरोपींनी बलभद्रसिंग याला दारुवाला पूल परिसरातील देवजीबाबा मंदिराजवळ सोडून दिले. घटनेनंतर भयभीत झालेला बलभद्रसिंग त्याचा चुलतभाऊ जयेंद्रसिंग याच्याकडे पोहोचला आणि त्याला घटनेची माहिती दिली. या प्रकरणी फरासखाना पोलिसांत गुन्हा दाखल करण्यात आला असून पोलिस पुढील तपास करत आहेत. पुण्यात शेअर बाजाराच्या नावाखाली 66 लाखांची ऑनलाइन फसवणूक पुण्यात शेअर बाजारातील गुंतवणुकीच्या नावाखाली सायबर गुन्हेगारांनी दोन वेगवेगळ्या घटनांमध्ये एकूण ६६ लाख रुपयांची फसवणूक केल्याची धक्कादायक माहिती समोर आली आहे. पहिल्या घटनेत वडगाव शेरी भागातील एका व्यक्तीची ४६ लाख २० हजार रुपयांची तर दुसऱ्या घटनेत एका तरुणाची २१ लाख ८१ हजार रुपयांची फसवणूक करण्यात आली. पहिल्या प्रकरणात सायबर गुन्हेगारांनी तक्रारदाराच्या मोबाईलवर शेअर बाजारातील गुंतवणुकीचा संदेश पाठवला. सुरुवातीला गुंतवणुकीवर परतावा मिळाल्याने तक्रारदाराचा विश्वास संपादन केला. त्यानंतर आणखी रक्कम गुंतवण्यास सांगून त्यांच्याकडून ४६.२० लाख रुपये उकळले. या प्रकरणी चंदननगर पोलीस ठाण्यात गुन्हा दाखल करण्यात आला असून वरिष्ठ पोलीस निरीक्षक सीमा ढाकणे तपास करत आहेत. दुसऱ्या घटनेत एका तरुणाची २१ लाख ८१ हजार रुपयांची फसवणूक करण्यात आली. याप्रकरणी बंडगार्डन पोलीस ठाण्यात गुन्हा दाखल करण्यात आला असून सहायक पोलीस निरीक्षक शिवशांत खोसे तपास करत आहेत. या घटना पुण्यातील वाढत्या सायबर गुन्हेगारीचे गंभीर स्वरूप दर्शवतात. नागरिकांनी शेअर बाजारासारख्या आर्थिक व्यवहारांमध्ये अत्यंत सावधगिरी बाळगण्याची आणि अशा संशयास्पद संदेशांकडे दुर्लक्ष करण्याची गरज आहे.