गुहाघरमध्ये वंचितच्या जिल्हाध्यक्षावर जीवघेणा हल्ला:हॉटेलमध्ये जेवत असताना तिघांकडून धारदार शस्त्राने सपासप वार, गाडीही फोडली

विधानसभा निवडणुकीच्या प्रचाराला दोन दिवस बाकी असताना रत्नागिरीतून धक्कादायक घटना समोर आली आहे. गुहाघरमध्ये वंचित बहुजन आघाडीचे जिल्हाध्यक्षावर प्राणघातक हल्ला झाल्याचा प्रकार समोर आला आहे. हॉटेलमध्ये जेवत असताना तिघा अज्ञातांनी त्यांच्यावर धारदार शस्त्राने सपासप वार केले. या हल्ल्यात वंचितचे जिल्हाध्यक्ष विकास उर्फ जाधव यांच्या हाताला गंभीर दुखापत झाली. या घटनेमुळे परिसरात एकच खळबळ उडाली आहे. गुहागर तालुक्यातील नरवण फाटा येथील एका हॉटेलमध्ये ही घटना घडली. वंचितचे जिल्हाध्यक्ष विकास उर्फ आण्णा जाधव हे हॉटेलमध्ये जेवण करत होते. यावेळी तिघे अज्ञात दुचाकीवरून हॉटेलमध्ये आले. आण्णा जाधव जेवण करत असतानाच तिघांनी त्यांच्यावर धारदार शस्त्राने सपासप वार केले. या हल्ल्यात आण्णा जाधव बचावले. मात्र, त्यांच्या हाताला गंभीर दुखापत झाली आहे. यानंतर हल्लेखोरांनी आण्णा जाधव यांच्या हॉटेलबाहेर उभ्या असलेल्या कारची देखील तोडफोड केली. हल्ल्यामागचे कारण अस्पष्ट आण्णा जाधव यांना तातडीने उपचारासाठी रुग्णालयात नेण्यात आले आहे. त्यांच्यावर उपचार सुरू आहेत. प्रचार संपण्याच्या दोन दिवस घडलेल्या या घटनेमुळे गुहागर तालुक्यात एकच खळबळ उडाली आहे. हा हल्ला वैयक्तिक कारणातून, आपापसातील वादातून किंवा राजकीय वैमस्यातून करण्यात आला? असे प्रश्न उपस्थित होत आहेत. दरम्यान, पोलिसांकडून आरोपीचा शोध सुरू असून त्यांचा शोध लागल्यावरच हल्ल्यामागील कारण स्पष्ट होणार आहे. 20 तारखेला मतदान, 23 तारखेला निकाल राज्यात विधानसभा निवडणुकीचा प्रचार शिगेला पोहोचला आहे. दोन दिवसांत प्रचाराच्या तोफा थंडावणार असून 20 नोव्हेंबर रोजी मतदान पार पडणार आहे. त्यानंतर 23 नोव्हेंबर रोजी मतदानाचा निकाल समोर येणार आहे. यंदाच्या महाराष्ट्रातील विधानसभा निवडणुकीकडे संपूर्ण राज्याचे विशेष लक्ष लागलेले आहे. कारण राज्यात गेल्या काही वर्षांमध्ये अनेक मोठमोठ्या राजकीय घडामोडी घडल्या आहेत. या घडामोडींनंतर सर्वसामान्य जनता कोणाला निवडून आणते? याकडे सर्वांचं लक्ष लागलेले आहे. यंदाच्या निवडणुकीत महायुती आणि महाविकास आघाडीत थेट लढत होत आहे.