ग्राहकाकडून भाजी विक्रेत्यावर चाकूने वार, पुणं हादरलं

पुण्यामध्ये गेल्या काही दिवसांमध्ये गुन्हेगारी अतिशय वाढली असून त्यामुळे सामान्य नागरिकांना मात्र जीव मुठीत धरून जगावं लागतंय. अशातच पुण्यातून अतिशय धक्कादायक बातमी समोर आली आहे. भाजी खरेदी करताना झालेल्या वादातून एका ग्राहकाने भाजीविक्रेत्यावर थेट वार केल्याची घटना घडली आहे. खडकी येथील संजय गांधी भाजी मंडईत हा धक्कादायक प्रकार घडला. त्यामुळे प्रचंड खळबळ माजली आहे. भाजी विक्रेत्याच्या खुनाचा प्रयत्न केल्याप्रकरणी खडकी पोलिसांनी आरोपी ग्राहकाविरुद्ध गुन्हा दाखल केला आहे.

मिळालेल्या माहितीनुसार, मनोज स्वामी (रा. इंदिरानगर, खडकी) असे गुन्हा दाखल केलेल्या ओरोपीचे नाव आहे. मनोज यांच्या हल्लयात भाजी विक्रेते शौकत बाबामियाँ (वय ३६, रा. दर्गा वसाहत, खडकी) हे गंभीर जखमी झाले आहेत. त्यांच्यावर रुग्णालयात उपचार सुरू आहे.

नेमकं काय झालं ?

खडकीतील संजय गांधी भाजी मंडईत शौकत बाबामियाँ यांचाभाजी विक्री व्यवसाय आहे. मंगळवारी रात्री साडेआठच्या सुमारास आरोपी मनोज स्वामी हा तेथे खरेदीसाठी आला होता. मात्र भाजी विकत घेत असताना मनोज स्वामीने शौकत यांच्याशी वाद घालण्यास सुरूवात केली, तसेच त्यांना शिवीगाळही केली. बघता बघता त्यांचा वाद वाढत गेला आणि बाचाबाचीतून आरोपीने हा हल्ला केला. त्याने शौकत यांच्या गळ्यावर तसेच चेहऱ्यावर चाकूने सपासप वार केले. या हल्ल्यात गंभीर जखमी झालेल्या शौकत यांना मंडईतील इतर भाजी विक्रेत्यंनी रुग्णालयात दाखल केले. मात्र या हल्ल्यानंतर आरोपी मनोज पसार झाला असून, खडकी पोलिसांनी त्याच्याविरुद्ध गुन्हा दाखल केला आहे. सहायक निरीक्षक अर्जुन बेंदगुडे अधिक तपास करत आहेत.