बीडमध्ये चाललंय काय? वाल्मीक कराडच्या बातम्या बघतो म्हणून कृष्णा आंधळेच्या मित्रांची तरुणाला बेदम मारहाण

बीड जिल्ह्यातील मस्साजोग गावचे सरपंच संतोष देशमुख यांचे हत्या प्रकरण संपूर्ण महाराष्ट्रात गाजत आहे. याप्रकरणी पोलिसांनी वाल्मीक कराडसह आठ आरोपींना बेड्या ठोकल्या आहेत. वाल्मीक कराडला सध्या न्यायालयीन कोठडीत ठेवण्यात आले असून या प्रकरणातील कृष्णा आंधळे नावाचा आरोपी अद्यापही फरार आहे. याच फरार आरोपीच्या मित्रांनी बीडमध्ये एका तरुणाला बेदम मारहाण केली आहे. वाल्मीक कराडच्या बातम्या बघतो म्हणून तरुणाला मारहाण करण्यात आली असून ‘तुझा संतोष देशमुख करू’, अशी धमकीही आरोपींनी दिली. या प्रकरणी आरोपींवर गुन्हाही दाखल करण्यात आला आहे.