जांभरून शिवारात अवैध वाळू वाहतूक करणारे ट्रॅक्टर पकडले:महसूलच्या पथकाची पहाटेची कारवाई, ट्रॅक्टर कळमनुरी पोलिस ठाण्यात जमा

कळमनुरी तालुक्यातील जांभरून शिवारातून अवैधरित्या वाळू वाहतूक करणारे ट्रॅक्टर महसूल विभागाच्या पथकाने शुक्रवारी ता. ७ पहाटे पकडले आहे. सदर ट्रॅक्टर कळमनुरी पोलिस ठाण्यात जमा करण्यात आले असून या प्रकरणी पुढील कारवाई केली जाणार असल्याचे महसूल विभागाच्या पथकाने सांगितले. कळमनुरी तालुक्यातील कयाधू नदीच्या पात्रातून तसेच काही ठिकाणी ओढ्यावरून वाळूचा अवैध उपसा करून त्याची वाहतूक केली जात आहे. विशेष म्हणजे महसूल विभागाला हुलकावणी देण्यासाठी मध्यरात्रीच्या वेळी वाळू उपसा करून पहाटेच्या वेळी त्याची वाहतूक केली जात आहे. या प्रकारानंतर जिल्हाधिकारी अभिनव गोयल यांच्या मार्गदर्शनाखाली उपविभागीय अधिकारी प्रतिक्षा भूते, तहसीलदार जीवककुमार कांबळे यांनी तलाठी तसेच महसूलच्या कर्मचाऱ्यांचे पथक रात्रीच्या वेळी गस्तीसाठी तैनात केले आहेत. दरम्यान, नांदापूर शिवारातून एका ट्रॅक्टरमधून वाळूची वाहतूक केली जात असल्याची माहिती पथकाला मिळाली होती. त्यावरून मंडळ अधिकारी आनंद काकडे, ग्राम महसूल अधिकारी विशाल पतंगे, प्रतिक पालखडे, विकास पंडीत, विजय भंडारे, महेश गळाकाटू, अमोल गंगावणे, घुगे यांच्या पथकाने शुक्रवारी पहाटे पासूनच जांभरून शिवारात वाहनांची तपासणी सुरु केली होती. यावेळी एका ट्रॅक्टरची तपासणी केली असता त्यात वाळू आढळून आली. दरम्यान, महसूलच्या पथकाने ट्रॅक्टर चालकाकडे विचारणा केली असता त्याला समाधानकारक उत्तरे देता आली नाही. त्यामुळे या पथकाने ट्रॅक्टर कळमनुरी पोलिस ठाण्यात आणून जमा केले आहे. या प्रकरणी पुढील कारवाई केली जाणार असल्याचे पथकाच्या सुत्रांनी सांगितले.