जि. प. अधिकारी, कर्मचाऱ्यांची धमाल; रंगतदार कलाविष्कारांनी वेधले लक्ष:कराओके, सिनेगीत, अभिनय, हास्यजत्रा, नृत्याने केले मंत्रमुग्ध‎

जिल्हा परिषद अधिकारी व कर्मचारी विभागीय क्रीडा व सांस्कृतिक महोत्सव विभागीय क्रीडा संकुलाच्या मैदानात सुरू आहे. महोत्सवात कराओके, समूह गीत, भक्तीगीत, भावगीत, लोकगीत, सिनेगीत, अभिनय, हास्यजत्रा व आदिवासी नृत्याने धमाल उडवली. अधिकारी, कर्मचाऱ्यांच्या विविध कला आविष्काराला उपस्थितांनी टाळ्यांच्या गजरात दाद दिली. या वेळी जि. प.च्या मुख्य कार्यकारी अधिकारी संजीता महापात्र यांच्या सुमधूर गीताने प्रेक्षकांची वाहवा मिळवली. येथील संत ज्ञानेश्वर सांस्कृतिक भवनात गुरुवारी सांस्कृतिक कार्यक्रम घेण्यात आला. या कार्यक्रमात अधिकारी व कर्मचाऱ्यांनी कराओके गीत, समूह नृत्य, विविध सिनेगीत, अभिनय, हास्य जत्रा असे बहारदार कार्यक्रमांचे सादरीकरण केले. सांस्कृतिक कार्यक्रमांच्या निमित्ताने अधिकारी व कर्मचारी यांनी कलेचा आविष्कार सादर करत समाज प्रबोधनात्मक कार्यक्रमातूनही लक्ष वेधले. या महोत्सवाचा बक्षीस वितरण सोहळा रविवारी (दि.२) होणार आहे. सांस्कृतिक कार्यक्रमात जि.प. च्या सीईओ संजीता महापात्र, उपमुख्य कार्यकारी अधिकारी तथा क्रीडा सचिव बाळासाहेब बायस, मुख्य लेखा तथा वित्त अधिकारी अश्विनी मारणे, लघु पाटबंधारे विभागाचे कार्यकारी अभियंता सुनील जाधव, बांधकाम विभागाचे कार्यकारी अभियंता दिनेश गायकवाड, कृषिविकास अधिकारी मलप्पा तोडकर, प्राथमिक विभागाचे शिक्षणाधिकारी डॉ. अरविंद मोहरे, उपशिक्षणाधिकारी बुद्धभूषण सोनोने यांनी सहभाग नोंदवून कर्मचाऱ्यांचा उत्साह वाढवला. तत्पूर्वी, अंजनगाव सुर्जी, मोर्शी, चांदूर रेल्वे, दर्यापूर, चिखलदरा, धामणगाव रेल्वे, नांदगाव खंडेश्वर, तिवसा, भातकुली, धारणी, अचलपूर, मुख्यालय, अमरावती, चांदूर बाजार, वरुड या पंचायत समितीमधील अधिकारी आणि कर्मचाऱ्यांनी आपल्या कलेचे सादरीकरण केले. सांस्कृतिक कार्यक्रमाचे सूत्रसंचालन शेख शकील, सुरेश चिमणकर, दीपिका भारती यांनी केले, अशी माहिती क्रीडा संयोजक डॉ. नितीन उंडे, सहसंयोजक पंकज गुल्हाने यांनी दिली. महोत्सवासाठी विनायक लकडे, शकील अहमद, राजेश सावरकर, श्रीनाथ वानखडे आदींनी परिश्रम घेतले. जिल्हा परिषदेच्या प्रशासक तथा मुख्य कार्यकारी अधिकारी संजीता महापात्र यांनी या क्रीडा व सांस्कृतिक महोत्सवात मधूर आवाजात गीत सादर केले. उपस्थितांनी या गीताला उत्स्फूर्त दाद दिली. सीईओ महापात्र यांच्या गीताने मिळवली दाद महोत्सवात प्रबोधनात्मक कार्यक्रमांची मेजवानी या महोत्सवात प्रबोधनात्मक कार्यक्रमातून समाजाचे लक्ष वेधले. नांदगाव खं. पं. स. च्या ‘नारी शक्ती अवतार काली’ या समूह नृत्याने सांस्कृतिक कार्यक्रम सुरू झाले. धामणगाव पं. स.चे ‘नारी उठा तलवार’, चिखलदरा पं. स.चे समूह नृत्य, अंजनगाव सुर्जी आदिवासी नृत्य, चांदूर बाजारच्या ‘सत्यम शिवम सुंदरम’ कराओके गीत, अचलपूर पं. स.चे शेतकरी व सैनिकांना समर्पित समूह नृत्यास दाद मिळाली.