​​​​​​​ज्ञानराधा मल्टिस्टेट साेसायटीच्या 37 कोटींच्या मालमत्तांचा होणार लिलाव:आर्थिक गुन्हे शाखेने पाठवला गृह मंत्रालयाकडे

3 hours ago 1
राज्यभर गाजलेल्या ज्ञानराधा मल्टिस्टेटच्या घोटाळ्यामुळे ठेवीदारांचे कोट्यवधी रुपये अडकून पडले आहेत. या मल्टिस्टेटवर ईडीनेही कारवाई केली आहे. आता आर्थिक गुन्हे शाखेने या मल्टिस्टेटच्या शहर व परिसरातील ३७ कोटींच्या शहरातील विविध मालमत्तांचा प्रस्ताव गृह मंत्रालयाकडे पाठवला आहे. त्यास मंजुरी मिळाल्यानंतर जिल्हा प्रशासन पुढील प्रक्रिया राबवेल. ज्ञानराधा मल्टिस्टेट सोसायटीच्या राज्यभरातील ५२ शाखांमध्ये ६ लाख ठेवीदारांचे ३७५० कोटी रुपये अडकून आहेत. यात शहरातील गारखेडा, पडेगाव आणि वाळूज या ३ शाखांमध्ये ५ हजार ठेवीदारांचे सुमारे १०० कोटी रुपये अडकून आहेत. ते परत मिळवण्यासाठी ठेवीदार, खातेदारांनी अनेक वेळा आंदोलन केले. खासदार, आमदारांच्या माध्यमातून पैसे मिळवण्यासाठी प्रयत्न केले. यासंदर्भात आर्थिक गुन्हे शाखेकडे तक्रारी केल्या आहेत. तिन्ही शाखा जुलै २०२४ पासून बंद आहेत. या प्रकरणी पंधरा दिवसांपूर्वी दोघांना अटक करण्यात आली होती. यासह सुरेश कुटे यांचा ताबा न्यायालयाकडे मागितला आहे. सध्या कुटे हा ईडीच्या कोठडीमध्ये आहे. दरम्यान, आर्थिक गुन्हे शाखेने कुटे याच्या शहर परिसरातील मालमत्तांची तपासणी करून त्या सील केल्या आहेत. या मालमत्तांचा विक्रीच्या प्रक्रियेसाठी गृह मंत्रालयाकडे प्रस्ताव पाठवला आहे. दोन दिवसांपूर्वी हा प्रस्ताव पाठवल्याची माहिती आर्थिक गुन्हे शाखेचे पोलिस निरीक्षक संभाजी पवार यांनी दिली. दोन दिवसांपूर्वीच पाठवला गृह खात्याकडे प्रस्ताव ज्ञानराधाच्या ठेवीदारांची २३ कोटींची फसवणूक झाल्याच्या तक्रारी आमच्याकडे आल्या आहेत. ही रक्कम जास्त असल्याचा दावा ठेवीदार करीत आहेत. यासंदर्भात ज्ञानराधा व कुटे यांच्या मालमत्तांची माहिती घेतल्यानंतर त्यांच्या ३७ कोटींच्या मालमत्तांचा प्रस्ताव दोन दिवसांपूर्वीच पाठवला आहे. - संभाजी पवार, पोलिस निरीक्षक, आर्थिक गुन्हे शाखा

*** Disclaimer: This Article is auto-aggregated by a Rss Api Program and has not been created or edited by Nandigram Times

(Note: This is an unedited and auto-generated story from Syndicated News Rss Api. News.nandigramtimes.com Staff may not have modified or edited the content body.

Please visit the Source Website that deserves the credit and responsibility for creating this content.)

Watch Live | Source Article