‘त्या’ महिलांना दिला मतदानाचा हक्क; संस्थेचा जिल्हा प्रशासनाने केला सन्मान:राष्ट्रसंत तुकडोजी महाराज शिक्षण व आरोग्य प्रसारक मंडळ संस्थेचा गौरव

लोकशाहीमध्ये प्रत्येक व्यक्तीला मतदानाचा अधिकार आहे. मतदानापासून कोणीही वंचित राहू नये, यासाठी अनेकांनी मतदान नोंदणी करण्यासाठी सहकार्य केले. समाजातील एक दुर्लक्षित घटक म्हणजे देहविक्री करून उपजीविका करणाऱ्या महिला. अशा अनेक महिलांसाठी गुरुकुंज मोझरी येथील राष्ट्रसंत तुकडोजी महाराज शिक्षण व आरोग्य प्रसारक मंडळ ही संस्था मागील १५ वर्षांपासून कार्य करत आहे. या अतिजोखीम गटातील महिला देहविक्री करून उपजीविका भागवतात. अशा महिला मतदानापासून वंचित राहू नये, यासाठी संस्थेने पुढाकार घेत मतदार नोंदणी शिबिर आयोजित करून मोठ्या प्रमाणात त्यांची नोंदणी करून घेतली. त्यामुळे या महिलांनी मतदानाचा हक्क बजावला. संस्थेच्या याच कार्याचा सन्मान म्हणून संस्थेचे सचिव डॉ. रघुनाथ वाडेकर व प्रकल्प व्यवस्थापक राजेंद्र साबळे यांचा सन्मान अमरावती जिल्ह्याचे उपजिल्हा निवडणूक अधिकारी शिवाजी शिंदे, उपविभागीय अधिकारी अनिल भटकर यांनी केला आहे. या वेळी अमरावतीचे तहसीलदार विजय लोखंडे व अन्य अधिकारी उपस्थित होते. संस्थेच्या या नवीन मतदार नोंदणी कार्यात संस्थेचे कर्मचारी प्रतीक्षा मोहोड, प्रज्ज्वल खांडेकर, कांचन तसरे, सुषमा अढाऊ, अनिता घुबळे, प्रवीण देशमुख, सुजाता गायकवाड व इतरांनी सहकार्य केले.