दिल्लीतील यशामागे अमित शहांचे कष्ट:आम्हाला अपेक्षित यश मिळाले नसले तरी खूप शिकायला मिळाले; अजित पवारांची प्रतिक्रिया

दिल्ली विधानसभा निवडणुकीत भाजपला बहुमत मिळाले. मागील 10 वर्षांपासून सत्तेत असलेल्या आम आदमी पक्षाला 22 जागांवर समाधान मानावे लागले. दिल्ली विधानसभा निवडणुकीतील या यशामागे अमित शहा यांचे कष्ट आणि निवडणूक व्यवस्थापनाचेही मोठे योगदान असल्याचे राष्ट्रवादी काँग्रेसचे अध्यक्ष तथा राज्याचे उपमुख्यमंत्री अजित पवार यांनी म्हटले आहे. राष्ट्रवादी काँग्रेसला दिल्ली विधानसभेत अपेक्षित यश मिळाले नसले, तरी या निवडणुकीतून आम्हाला खूप शिकायला मिळाले, असेही ते म्हणाले. भाजपने सुमारे 27 वर्षांनंतर दिल्लीत पुनरागमन केले. 2020 मध्ये फक्त 8 जागा मिळालेल्या भाजपने यंदाच्या विधानसभा निवडणुकीत सुमारे 45 पेक्षा अधिक जागांवर आघाडी घेतली आहे. तर आम आदमी पार्टीला 22 जागांवर समाधान मानावे लागणार आहे. विशेष म्हणजे आम आदमी पक्षाचे राष्ट्रीय अध्यक्ष आणि दिल्लीचे माजी मुख्यमंत्री अरविंद केजरीवाल यांना पराभवाचा सामना करावा लागला. दिल्ली विधानसभा निवडणुकीत अजित पवार यांच्या राष्ट्रवादी काँग्रेसने देखील उमेदवार उभे केले होते. मात्र सर्वांना पराभव स्वीकारावा लागला. यावर अजित पवार यांनी प्रतिक्रिया दिली आहे. सोशल मीडियावर पोस्ट शेअर करत त्यांनी भाजपचे अभिनंदन केले. काय म्हणाले अजित पवार? दिल्ली विधानसभेतील निर्णायक विजयाबद्दल मी प्रधानमंत्री मा.श्री. नरेंद्र मोदी जी, केंद्रीय गृहमंत्री मा.श्री. अमित शहा जी आणि भाजपचे राष्ट्रीय अध्यक्ष श्री जे.पी नड्डा जी यांचं मनापासून अभिनंदन करतो. दिल्लीत स्थापन होणाऱ्या नवीन सरकारला उत्तम कामगिरीसाठी शुभेच्छा देतो. दिल्ली विधानसभा निवडणुकीत ‘एनडीए’चा प्रमुख घटकपक्ष असलेल्या भाजपला मिळालेल्या 40 हून अधिक जागा या प्रधानमंत्री नरेंद्र मोदीजींच्या नेतृत्वावर दिल्लीकरांनी व्यक्त केलेल्या विश्वासाचं प्रतिक आहेत. केंद्र आणि दिल्ली विधानसभेतही प्रधानमंत्र्यांच्या विचारांचे डबल इंजिन सरकार आल्याने दिल्लीच्या सर्वांगीण विकासाला दुप्पट गती मिळेल. चांगले रस्ते, स्वच्छ पाणी, उत्तम शिक्षण, दर्जेदार आरोग्य सुविधांचे, देशाच्या राजधानीचे सर्वांगसुंदर शहर हे दिल्लीकरांचे स्वप्न पूर्ण होईल, असा विश्वास अजित पवार यांनी व्यक्त केला. शहा आणि सचदेव यांच्या कार्याचे कौतुक दिल्लीतील भाजपच्या यशामागे केंद्रीय गृहमंत्री अमित शहा यांच्या कष्ट व निवडणूक व्यवस्थापनाचेही मोठे योगदान आहे. दिल्ली भाजपचे अध्यक्ष वीरेंद्र सचदेव आणि त्यांच्या टीमने घेतलेली मेहनतही महत्वाची ठरली, असे अजित पवार यांनी म्हटले. अपयशाचे विश्लेषण करून मेहनत घेणार राष्ट्रवादी काँग्रेसला दिल्ली विधानसभेत अपेक्षित यश मिळालं नसले तरी या निवडणुकीतून आम्हाला खुप शिकायला मिळाले आहे. ही सुरुवात आहे. मिळालेल्या अपयशाचे विश्लेषण करुन भविष्यात देशपातळीवर पक्षबांधणीसाठी अधिक मेहनत घेतली जाईल. दिल्लीसह इतर अन्य राज्यात पक्षाचा विस्तार करण्यावर लक्ष केंद्रीत करण्यात येईल. दिल्ली विधानसभेत अजित पवारांच्या सर्व उमेदवारांचे डिपॉझिट जप्त दिल्ली विधानसभेच्या 70 जागांसाठी झालेल्या निवडणुकीत उपमुख्यमंत्री अजित पवार यांच्या पक्षाचा मोठा पराभव झाला आहे. दिल्लीत अजित पवार यांच्या राष्ट्रवादी काँग्रेस पक्षाने 30 उमेदवार उभे केले होते. या सर्व उमेदवारांचे डिपॉझिट जप्त झाले आहे. पक्षाला या निवडणुकीत केवळ 0.03 टक्के मते मिळाली आहेत. जुलै 2023 मध्ये अजित पवार आणि शरद पवार गटात राष्ट्रवादीचे विभाजन झाल्यानंतर दिल्लीतील ही पक्षाची पहिलीच निवडणूक होती. मात्र, या निवडणुकीतही त्यांना फारसे यश आले नाही. अजित पवार यांच्या पक्षाचे उमेदवार देखील पहा... बुरारी - रतन त्यागी बदली - मुलायम सिंह रिठाला - लखन प्रजापती मंगोल पुरी (SC)- खेमचंद बसवाल शालिमार बाग - मो. उस्मान चांदनी चौक - खालिद उर रहमान मतिया महाल - मोहम्मद. जावेद बल्ली मारन - मोहम्मद. आरोन मोती नगर - सदरे आलम मादीपूर (SC)- हरीश कुमार हरी नगर - शब्बीर खान जनकपुरी - मो. नवीन विकासपुरी - हमीद नवी दिल्ली - विश्वनाथ अग्रवाल कस्तुरबा नगर - सुरेंद्र सिंग हुड्डा मालवीय नगर - मो. समीर छतरपूर - नरेंद्र तंवर देवळी (SC)- खेमचंद राजोरा संगम विहार - कमर अहमद कालकाजी - जमील तुघलकाबाद - प्रेम खटाना बदरपूर - इम्रान सैफी लक्ष्मी नगर - दानिश अली कृष्णा नगर - राजेंद्र पाल शाहदरा - राजेश लोहिया सीमा पुरी (SC)- अभिषेक रोहतास नगर - मेहक डोगरा घोंडा - जगदीश भगत गोकलपूर (SC)- जगदीश भगत करावल नगर - संजय मिश्रा