दुर्मिळ प्रकरण: पोटात बाळ असलेल्या नवजात बाळाची प्रकृती स्थिर:अमरावतीच्या सुपर स्पेशालिटी रुग्णालयात यशस्वी शस्त्रक्रिया; आठवडाभर निगराणी आवश्यक

अमरावतीच्या सुपर स्पेशालिटी रुग्णालयात एका दुर्मिळ वैद्यकीय प्रकरणाने वैद्यकीय क्षेत्रात खळबळ उडवून दिली आहे. बुलडाणा जिल्ह्यातील एका नवजात बाळाच्या पोटात आढळलेल्या अर्भकसदृश मांसाच्या दोन गोळ्यांची यशस्वी शस्त्रक्रिया करण्यात आली आहे. एक फेब्रुवारीच्या मध्यरात्रीनंतर बुलडाणा जिल्ह्यातील घाटाखालच्या गावात एका महिलेने सव्वा दोन किलोग्रॅम वजनाच्या बाळाला जन्म दिला. प्रसुतीपूर्व सोनोग्राफीमध्ये या बाळाच्या पोटात आणखी दोन बाळ असल्याचे आढळले होते. वैद्यकीय भाषेत या दुर्मिळ प्रकाराला 'पीटस् इन पिट्टू' किंवा 'टेराटोमा' असे संबोधले जाते. डॉ. अमोल नरोटे आणि डॉ. मंगेश मेंढे यांच्या मार्गदर्शनाखाली पॅडियाट्रिक सर्जन डॉ. उषा गजभिये यांच्या नेतृत्वात दीड तासांची शस्त्रक्रिया यशस्वीरीत्या पार पडली. डॉ. नवीन चौधरी यांनी सहकार्य केले, तर भूलतज्ज्ञ डॉ. संजय महतपुरे यांनी त्यांची महत्त्वपूर्ण भूमिका बजावली. सध्या बाळाला सलाईन आणि औषधी द्रव्यांद्वारे पोषण दिले जात असून, त्याची प्रकृती स्थिर आहे. डॉक्टरांच्या मते पुढील आठवडाभर बाळाला निगराणीखाली ठेवणे आवश्यक आहे. बाळाची आई बुलडाणा येथे उपचार घेत आहे. या दुर्मिळ शस्त्रक्रियेमुळे अमरावतीच्या सुपर स्पेशालिटी रुग्णालयाने वैद्यकीय क्षेत्रात नवा उच्चांक प्रस्थापित केला आहे. या रुग्णालयाने यापूर्वीही किडनी प्रत्यारोपण, डायलिसिस आणि केमोथेरपी यासारख्या गुंतागुंतीच्या उपचारांमध्ये उल्लेखनीय यश मिळवले आहे.