नगरला मद्यधुंद कारचालकाने चौघांना उडवले:1 ठार, 3 गंभीर, कारच्या धडकेत ढवळगावात दोन भावांसह तिघे गंभीर

अहिल्यानगरच्या मार्केट यार्डच्या महात्मा फुले चौकात भरधाव असलेल्या एका मद्यधुंद कारचालकाने चौघांना उडवले. एका चारचाकीसह काही दुचाकींनाही धडक दिली. यात एकाचा मृत्यू झाला, तर तीन जखमी झाले आहेत. सोमवारी सायंकाळी ही घटना घडली. कारचालक राजू विठ्ठल खांडवे (४७, रा. सांडवे, ता. अहिल्यानगर) याला ताब्यात घेतले. दरम्यान, श्रीगाेंदा तालुक्यातील ढवळगावात बस थांबा परिसरात सोमवारी गाडीची तिघांना धडक बसली. त्यातील दोघांची प्रकृती गंभीर आहे. अहिल्यानगर शहरात झालेल्या अपघातात रवींद्र रमेश कानडे (२७, रा. अहिल्यानगर) हे ठार झाले, तर रोहित संतोष मांजरे, जय अशोक जाधव व आसाराम तुळशीराम शिंदे हे जखमी झाले. सायंकाळी सहा वाजेच्या सुमारास महात्मा फुले चौकातील एका पानाच्या दुकानाजवळ चौघे उभे होते. या वेळी सहकार सभागृहाकडून येणाऱ्या रस्त्यावरून एक कार वेगात आली. काही कळायच्या आत कारने एक दुचाकी व चौघांना उडवले. पुढे जाऊन कारचालकाने एका कारला धडक दिली. घटनास्थळी नागरिकांनी धाव घेत जखमींना रुग्णालयात दाखल केले. अपघातात एकाचा मृत्यू झाला. मद्यधुंद कारचालकाला नागरिकांच्या मदतीने पोलिसांनी ताब्यात घेतले असून गुन्हा दाखल करण्याची प्रक्रिया सुरू असल्याचे निरीक्षक दराडे यांनी सांगितले.