पंचांना लाथ मारणारा राक्षे, मैदान सोडणारा महेंद्र गायकवाड निलंबित:अंतिम सामन्यात एका गुणावर आक्षेप घेऊन गायकवाडची माघार

महाराष्ट्र केसरीच्या अंतिम सामन्यात पुण्याच्या पृथ्वीराज मोहोळने सोलापूरच्या महेंद्र गायकवाड याचा पराभव करून महाराष्ट्र केसरी किताब पटकावला. शेवटचे १६ सेकंद शिल्लक असताना एका गुणावर आक्षेप घेत गायकवाडने मैदान सोडले. त्यामुळे मोहोळला विजयी घोषित केले. अहिल्यानगर येथे सुरू असलेल्या ६७ व्या महाराष्ट्र केसरी स्पर्धेच्या अंतिम सोहळ्याला २५ हजार कुस्तीप्रेमी उपस्थित होते. मोहोळ आणि गायकवाड यांच्यामध्ये अंतिम लढत झाली. ८:४५ वाजता सामना सुरू झाला. पहिल्या मिनिटात दोघांना एकही गुण मिळाला नाही. गायकवाड याचा कॉश्च्युम फाटल्यामुळे काही वेळ सामना थांबला. त्यानंतर लढत सुरू होताच मोहोळने पहिला गुण मिळवत आघाडी घेतली. ती शेवटच्या क्षणापर्यंत कायम ठेवून आणखी एक गुण मिळवला. त्यावर गायकवाडने आक्षेप घेत १६ सेकंद खेळ शिल्लक असताना मैदान सोडले. त्यामुळे माेहोळला विजेता, गायकवाडला उपविजेता जाहीर केले. अध्यक्षांकडून तातडीने कारवाई महाराष्ट्र कुस्तीगीर संघटनेचे अध्यक्ष रामदास तडस यांनी स्पर्धेत नियमभंग करणारा शिवराज राक्षे व महेंद्र गायकवाड या दोघांनाही तीन वर्षांसाठी निलंबित करण्यात येणार असल्याची घोषणा केली. हे दोन्ही मल्ल यापुढे तीन वर्षे कुठलीही स्पर्धा खेळू शकणार नसल्याचे त्यांनी सांगितले. पुण्याचा पृथ्वीराज मोहोळ ठरला महाराष्ट्र केसरी उपमुख्यमंत्री अजित पवार यांच्या हस्ते महाराष्ट्र केसरी ठरलेल्या पृथ्वीराज माेहोळ याला मानाची चांदीची गदा व थार ही चारचाकी गाडी बक्षीस देण्यात आली. उपविजेता ठरलेल्या गायकवाडला बाेलेरो गाडी बक्षीस जाहीर केली. मला जो गुण दिला त्यावर महेंद्र याने उशिरा आक्षेप का घेतला हे कळाले नाही. मी २ गुणांनी पुढे होतो. त्यातच महेंद्रने मैदान सोडल्याने मला विजयी घोषित केले.’ - पृथ्वीराज मोहोळ, विजेता उपांत्य फेरीत चितपट होताच राक्षेने पंचाची गचांडी धरून लाथ मारली उपांत्य फेरीच्या गादीवरील लढती दोन वेळचा महाराष्ट्र केसरी शिवराज राक्षे व पृथ्वीराज मोहाेळ यांच्यात झाली. या सामन्यात पंचांनी राक्षेला चितपट व मोहोळला विजयी घोषित केले. या निकालावर संताप व्यक्त करत राक्षेने पंच संताेष भुजबळ यांची गचांडी धरत लाथ मारली. त्यामुळे एकच गदारोळ झाला. अंतिम सामन्यात गायकवाडने पराभव अमान्य केल्याने खुर्च्यांची फेकाफेक झाली होती.