पर्यावरण, हरित ऊर्जा विषयांवर विद्यार्थ्यांनी तयार केले मॉडेल्स:पर्यावरण परिषद अंतर्गत पोस्टर व मॉडेल स्पर्धा उत्साहात‎

अहिल्यादेवी महिला व शिक्षण प्रसारक मंडळाच्या वतीने आयोजित पर्यावरण परिषद २०२४-२५ अंतर्गत विद्यार्थ्यांसाठी घेण्यात आलेल्या पोस्टर व मॉडेल स्पर्धा मोठ्या उत्साहात आणि विज्ञाननिष्ठ वातावरणात संपन्न झाल्या. पोस्टर स्पर्धा व प्रदर्शन ३ फेब्रुवारी रोजी आणि मॉडेल स्पर्धा व प्रदर्शन ४ फेब्रुवारी रोजी सीआरबी हायस्कूल तसेच ज्ञान दर्पण इंग्रजी शाळा, न्यू खेतान नगर कौलखेड अकोला येथे पार पडल्या. या स्पर्धांमध्ये विविध शाळांमधील विद्यार्थ्यांनी मोठ्या प्रमाणावर सहभाग नोंदवला. विद्यार्थ्यांनी पर्यावरण संवर्धन, प्रदूषण नियंत्रण, हरित ऊर्जा, पुनर्वापर, जलसंवर्धन यासारख्या विषयांवर आधारित पोस्टर आणि मॉडेल्स सादर केली. त्यांच्या सर्जनशीलतेने आणि विज्ञानविषयक दृष्टिकोनाने उपस्थितांची मने जिंकली. मॉडेल स्पर्धेचे उद्घाटन महानगरपालिकेचे आयुक्त सुनील लहाने यांच्या हस्ते करण्यात आले. त्यांनी विद्यार्थ्यांशी संवाद साधून त्यांना पर्यावरण विषयक नवकल्पनांसाठी प्रोत्साहित केले. उद्योजक चंदू लड्डा यांनी विद्यार्थ्यांशी संवाद साधला. स्पर्धांचे परीक्षण जयमाला खेडकर, डॉ. दीपिका जैन, सुवर्णा नागपुरे, शरद कोकाटे, अमित सबनीस, मयूर सोमतकर यांनी केले. सूत्रसंचालन पल्लवी मोकळे यांनी केले. प्रमुख पाहुणे म्हणून डॉ. अर्चना सावरकर, जयमाला खेडकर आणि संजय कुलकर्णी उपस्थित होते. संयोजन पल्लवी कुलकर्णी, सहसंयोजक अनिता कुलकर्णी आणि कुशल सेनाड यांनी केले. या उपक्रमाच्या पुढील टप्प्यात, लवकरच पर्यावरण परिषद आयोजित करण्यात येणार आहे. ज्यामध्ये विद्यार्थी अकोला शहरातील प्रदूषण घटकांचे अभ्यास करतील. या परिषदेमध्ये विद्यार्थी विविध प्रदूषण घटकांचा सखोल अभ्यास करून त्यांच्या निवारणासाठी प्रभावी उपाययोजना ठरवणार आहेत. विद्यार्थ्यांच्या विचारविनिमयातून निर्माण होणारे निर्णय पर्यावरण संवर्धनासाठी महत्त्वाचे ठरणार आहेत. या उपक्रमामुळे विद्यार्थ्यांमध्ये पर्यावरण संवर्धनाबाबत जागरूकता निर्माण झाली असून, त्यांनी पर्यावरण रक्षणासाठी सकारात्मक दृष्टिकोन विकसित केला आहे.