पानकरनेगाव येथे घर फोडून लाखोंचा ऐवज पळविला:स्थानिक गुन्हे शाखेच्या पथकासह सेनगाव पोलिसांच्या वतीने तपास सुरु

सेनगांव तालुक्यातील पानकनेरगाव येथे चोरट्यांनी घर फोडून लाखोंचा ऐवजी पळविल्याची घटना शनिवारी ता 8 सकाळी उघडकीस आली आहे. स्थानिक गुन्हे शाखेच्या पथकासह सेनगाव पोलिसांचे पथक घटनास्थळी दाखल झाले आहे. याबाबत सूत्रांनी दिलेल्या माहितीनुसार सेनगाव तालुक्यातील पानकनेरगाव येथे संतोष शिंदे यांचे गावालगतच शेतात घर आहे. या ठिकाणी त्यांची रोपवाटिका देखील आहे. शुक्रवारी ता ७ रात्री शिंदे कुटुंबीय जेवण करून झोपले होते. मध्यरात्रीच्या सुमारास चोरट्यांनी त्यांच्या घरात प्रवेश केला. यावेळी चोरट्यांनी शिंदे कुटुंबीय झोपलेल्या खोलीची बाहेरून कडी लावली. त्यानंतर चोरट्यांनी दुसऱ्या खोल्यांमध्ये प्रवेश करून साहित्य अस्ताव्यस्त केले.त्यानंतर चोरट्यांनी लोखंडी कपाट फोडून त्यातील साहित्य देखील बाहेर काढून फेकले. तर एक लोखंडी पेटी ताब्यात घेतली या लोखंडी पेटी मध्ये सुमारे २० तोळे सोन्या चांदीचे दागिने व रोख काही रक्कम होती. सदरील पेटी घेऊन चोरट्यांनी पळ काढला. त्यानंतर घरापासून काही अंतरावर चोरट्यांनी पेटी उचकटून त्यातील दागिने व रक्कम सोबत नेली व पेटी व इतर कागदपत्र तेथेच टाकून दिले. दरम्यान आज सकाळी शिंदे कुटुंबीय जागे झाले असताना घराची कडी बाहेरून लावल्याची दिसून आले. त्यांनी मोबाईल वरून शेजाऱ्यांशी संपर्क साधल्यानंतर शेजाऱ्यांनी कडी उघडली. शिंदे कुटुंबीयांनी घरात पाहणी केली असता घरात चोरी झाल्याचे लक्षात आले. त्यांनी तातडीने या घटनेची माहिती सेनगाव पोलिसांना दिली सेनगांव पोलीस ठाण्याचे पोलीस निरीक्षक संतोष तांबे, सहाय्यक पोलीस निरीक्षक अशोक घारगे, स्थानिक गुन्हे शाखेचे सहाय्यक पोलीस निरीक्षक कपिल आगलावे, जमादार विठ्ठल काळे, पांडुरंग राठोड, किशोर कातकडे, सुभाष चव्हाण, राजू जाधव यांच्या पथकाने घटनस्थळी भेट दिली. पोलिसांनी श्वान पथकाला प्रचारण केले मात्र श्वानपथक सावरखेडा मार्गापर्यंत चोरट्यांचा मार्ग काढू शकले. ठसे तज्ञ ही घटनास्थळी दाखल झाले आहेत. दरम्यान पोलिसांनी परिसरातील सीसीटीव्ही फुटेजची पाहणी केली असता चोरटे रात्री दीड ते तीनच्या सुमारास या भागात आल्याचे स्पष्ट झाले आहे. सीसीटीव्ही फुटेज वरून पोलिसांनी चोरट्यांची ओळख पटविण्याचे प्रयत्न चालवले आहेत. याप्रकरणी सेनगाव पोलीस ठाण्यात गुरा दाखल झाला नव्हता