महिला तलाठ्याच्या संभाषणाचे रेकॉर्डिंग व्हायरल:​​​​​​​औंढा तालुक्यातील प्रकार, तहसीलचे वरिष्ठ अधिकारी चौकशीच्या फेऱ्यात

औंढा नागनाथ तालुक्यातील एका तलाठी महिलेच्या वाळू वाहतूकदारासोबत झालेल्या संभाषणाची रेकॉर्डींग समाज माध्यमावर व्हायरल झाली असून या प्रकरणात आता तहसीलचे वरिष्ठ अधिकारी देखील चौकशीच्या फेऱ्यात अडकण्याची चिन्हे दिसू लागली आहेत. औंढा नागनाथ तालुक्यातून मागील काही दिवसांत मोठ्या प्रमाणावर वाळू उपसा होऊन त्याची वाहतूक केली जात आहे. जिल्हयातील इतर वाळू घाटापेक्षा औंढा नागनाथ तालुक्यातील पूर्णा नदीच्या वाळू घाटातील वाळूला मोठी मागणी आहे. त्यामुळे औंढा नागनाथ तालुक्यातूनच सर्वात जास्त अवैधरित्या वाळू उपसा करून त्याची वाहतूक केली जात आहे. दरम्यान, जिल्हा प्रशासनाच्या वरिष्ठ अधिकाऱ्यांनी दिलेल्या सूचने नुसार जिल्हयात पथके स्थापन करून वाळू उपसा व वाहतूक रोखण्याचे प्रयत्न केले जात आहेत. त्यात कळमनुरी तालुक्यात तलाठ्यांच्या पथकावर तीन वेळा हल्लयाच्या घटनाही घडल्या असून या प्रकरणी गुन्हे दाखल झाले आहेत. मात्र औंढा नागनाथ तालुक्यात वेगळेच चित्र दिसू लागले आहे. या तालुक्यात एका महिला तलाठ्याने वाळू वाहतूकदाराशी संपर्क साधला. त्या ‘राजा’ नावाच्या व्यक्तीचे काय झाले, तो दुसरा गुन्हा दाखल करण्याची वाट पहात आहेत काय अशी विचारणा करून दुसरा गुन्हा दाखल करण्यासाठी पोलिस ठाण्यात जात असल्याचेही सांगितले. त्यांच्यातील संशयास्पद असलेल्या संभाषणाची रेकॉर्डींग व्हयरल झाल्यानंतर महसूल विभागात एकच खळबळ उडाली आहे. दरम्यान, महिला तलाठ्यांच्या या प्रतापामुळे तहसीलचे वरिष्ठ अधिकारीही चौकशीच्या फेऱ्यात अडकण्याची चिन्हे दिसू लागली आहे. या प्रकरणी तहसीलदार हरिष गाडे यांच्याशी मोबाईलवरून संपर्क साधला असता त्यांनी अद्याप अशी कोणतीही तक्रार माझ्याकडे आली नसल्याचे स्पष्ट केले.