डोंबिवलीत जेवणाच्या वादातून मजुराचा खून

डोंबिवली : पश्चिम डोंबिवलीतील पंडित दिनदयाळ रोडला चालू असलेल्या इमारत बांधकामाच्या ठिकाणी शुक्रवारी रात्री दोन मजूर आणि इतरांमध्ये जेवण सांडण्यावरून वाद झाला. या वादातून एका मजुराने रात्रीच्या वेळेत आपल्या सहकारी मजूराची डोक्यात काठी घालून हत्या केली. या घटनेनंतर विष्णूनगर पोलिसांनी खून्याला तात्काळ अटक केली आहे.

पंडित दिनदयाळ रोडला नवीन इमारत उभारणीचे काम सुरू आहे. याठिकाणी ओरीसा राज्यातल्या एकाच गावातील रहिवासी असलेले मजूर काम करतात. हे मजूर संध्याकाळी काम आटोपल्यावर एकत्रितपणे जेवण बनवितात. गुरूवारी रात्री तयार केलेले जेवण सांडल्यावरून गौरव जगत, जयसान मांझी आणि इतरांमध्ये वाद झाला. त्यांच्यात कडाक्याचे भांडण झाले. हा वाद इतर मजुरांनी तेथेच मिटवून टाकला. त्यानंतर रात्री सर्व मजूर नव्याने इमारत उभारत असलेल्या इमारतीच्या वरच्या मजल्यावर झोपण्यासाठी गेले.

जेवण सांडण्यावरून गौरव जगत याने आपल्याशी भांडण केल्याचा राग जयसान मांझी यांच्या मनात होता. गौरव जगत गाढ झोपेत असताना जयसान याने जवळच पडलेली बांबूची काठी गौरवच्या डोक्यात घातली. गाढ झोपेत गाफील असलेला गौरव हा हल्लेखोर जयसानला प्रतिकार करू शकला नाही. त्यामुळे गौरव रक्ताच्या थारोळ्यात जागीच तडफडून गतप्राण झाला. आक्रोश ऐकून इतर मजूर वरच्या मजल्यावरून खाली आले. जयसान याने गौरवचा खून केल्याचे उघडकीस आले. मजुरांनी ही माहिती तात्काळ पोलिसांना दिली. वरिष्ठ पोलिस निरीक्षक संजय पवार, गुन्हे प्रकटीकरण शाखेचे पोलिस निरीक्षक गहिनाथ नमे आणि त्यांचे सहकारी घटनास्थळी दाखल झाले. पोलिसांनी घटनास्थळाचा पंचनामा करून गौरव जगत याचा मृतदेह उत्तरीय तपासणीसाठी केडीएमसीच्या शास्त्रीनगर हॉस्पिटलकडे पाठवून दिला. या प्रकरणातील गौरवचा खून करणारा जयसान मांझी याला पोलिसांनी अटक केली.