पार्थिव, मातेचे शिवलिंग जलद फळ देणारे- शास्त्री जनक जोशी:शास्त्रीनगरात ओम नमः शिवायचा गजर

वेगवेगळ्या प्रकारचे शिवलिंग हे वेगवेगळ्या भक्तांच्या पूजन विधीचे परिचायक आहेत. मात्र, त्यात पार्थिव व मातीचे शिवलिंग हे श्रेष्ठ व जलद फळ देणारे असून, अशा शिवलिंगाचे पूजन करत शाश्वत सुखाची प्राप्ती करण्याचे आवाहन शिवमहापुराण कथाकार शास्त्री जनक जोशी यांनी केले. ते शास्त्री नगर परिसरातील जय अंबे माता संस्थानात महाशिवपुराण कथेचे द्वितीय पुष्प अर्पित करताना मार्गदर्शन करत होते. पू. शास्त्री जनक जोशी यांनी शिवलिंगाचे महात्म्य विषद केले. ते म्हणाले, शिवलिंगाची स्थापना शुद्ध व तीर्थक्षेत्र असणाऱ्या भूमीत झाली पाहिजे. तसेच शिवलिंगाचे जल, माती व साहित्य शुद्ध व अभिमंत्रित करून घ्यावे. पंचाक्षरी मंत्राचा जप करून शुद्ध भावनेने शिवलिंगाची स्थापना करावी. अशा शिवलिंगाने सुख समृद्धी व भक्ती निर्माण होत असल्याचे त्यांनी सांगितले. सत्र प्रारंभी शास्त्री जनक जोशी यांचे स्वागत यजमान डॉ. तृप्ती भाटिया व मुकेश भाटिया यांनी केले. रविवार, ९ फेब्रुवारीपर्यंत रोज दुपारी २ ते सायंकाळी ५ वाजेपर्यंत आयोजित शिवमहापुराण कथा व रात्री ८ वाजता आयोजित विविध मंडळाच्या भजन कार्यक्रमाचा भाविकांनी लाभ घेण्याचे आवाहन जय अंबे माता संस्थान शास्त्री नगर, डॉ. तृप्ती भाटिया व शिवाय अध्यात्मिक व संशोधन केंद्राने केले आहे. सुसंस्कार आवश्यक : पू. शास्त्री यांनी विघ्नेश्वर संहिताची परिभाषा प्रतिपादित केली. तसेच भक्तांचे लक्षण व शिवभक्त कसा ओळखावा याचे सुंदर विवेचन केले. सत्र प्रारंभी पू. शास्त्री यांनी मंगलाचरण सादर करत माता- पित्यांनी आपल्या पाल्यावर सुयोग्य संस्कार करण्याचे यथोचित मार्गदर्शन केले. कथास्थळी रात्री वाजता राधाकृपा भजनी मंडळाचा भक्तिमय भजन कार्यक्रम संपन्न झाला. अशी सांगितली कथा शास्त्री यांनी पतीच्या सांगण्यावरून व्यभिचारी झालेल्या चंचुला या महिलेची कथा सांगितली. व्यभिचारी चंचुला ही व्यक्तींना फसवण्याचे काम करत होती. तिने पुष्कळ पापकर्म केली होती. मात्र, महादेवाच्या मंदिरात अनावधानाने गेल्यामुळे तिला आपल्या वाईट कर्माचा पश्चाताप होऊन ती शिव पूजनात नंतर आपले जीवन घालवते. संत तिला सन्मार्गावर घेऊन जातात. परिणामी तिचे सर्व पाप नष्ट होऊन ती अंतिम समयी स्वर्गरूपी कैलासधाममध्ये सुखासीन होते. तिला येथे पण आपल्या पतीची आठवण होते. पती आपल्या पापामुळे नरक समान पिशाच्च जाळ्यात दिसून येतात. पत्नीने तेथे आपल्या पतीस शिव महापुराणचे श्रवण करवले. त्यामुळे त्यांची पण पापातून मुक्ती झाल्याची रोमहर्षक व भक्तिमय कथा सांगितली.