पुणे महापालिकेच्या कंत्राटी कर्मचाऱ्याचा खून:अनैतिक संबंधांमुळे महिलेच्या मुलाने साथीदारांसह केला जीवघेणा हल्ला, तीन ते चार आरोपी ताब्यात

पुण्यातील कोथरूड परिसरात एका धक्कादायक घटनेने खळबळ उडाली आहे. पुणे महापालिकेच्या सफाई विभागातील कंत्राटी पर्यवेक्षक राहुल दशरथ जाधव (वय ३०) यांचा धारदार कोयत्याने वार करून खून करण्यात आला. अनैतिक संबंधांतून घडलेल्या या प्रकरणी पोलिसांनी तीन ते चार आरोपींना ताब्यात घेतले आहे. घटनेची माहिती अशी की, राहुल जाधव यांचे एका महिलेशी अनैतिक संबंध होते. हे संबंध महिलेच्या मुलाच्या कानावर गेल्यानंतर त्याने आपल्या मित्रांसोबत राहुलचा खून करण्याचा कट रचला. कोथरूडमधील शास्त्रीनगर भागातील सागर कॉलनीकडे जाणाऱ्या रस्त्यावर दुचाकीवर असलेल्या राहुलचा पाठलाग करून आरोपींनी त्याच्यावर कोयत्याने जीवघेणा हल्ला केला. गंभीर जखमी झालेल्या राहुलला तात्काळ खासगी रुग्णालयात दाखल करण्यात आले, मात्र उपचारादरम्यान त्यांचा मृत्यू झाला. घटनेची माहिती मिळताच पोलीस उपायुक्त संभाजी कदम, सहायक आयुक्त भाऊसाहेब पटारे आणि गुन्हे शाखेचे पोलीस निरीक्षक विक्रमसिंह कदम यांनी घटनास्थळी भेट दिली. मृतक राहुल जाधव हे उंबरे (ता. भोर, जि. पुणे) येथील रहिवासी होते. त्यांचा भाऊ केतन जाधव (वय २७) याने कोथरूड पोलीस ठाण्यात आरोपींविरुद्ध फिर्याद दाखल केली आहे.