पुण्यात 7 ते 9 फेब्रुवारी राज्यस्तरीय कुस्ती स्पर्धा:विजेत्यांना मिळणार 'थार', एकूण 45 लाखांची बक्षिसे; अजित पवारांच्या हस्ते होणार उद्घाटन

पुण्यात येत्या ७ ते ९ फेब्रुवारी दरम्यान हिंदू गर्जना प्रतिष्ठान आणि पुनीत बालन ग्रुप यांच्या संयुक्त विद्यमाने भव्य कुस्ती स्पर्धेचे आयोजन करण्यात आले आहे. स. प. महाविद्यालयाच्या मैदानावर होणाऱ्या या स्पर्धेत एकूण ४५ लाख रुपयांची बक्षिसे ठेवण्यात आली आहेत. खुल्या गटातील पुरुष विजेत्याला महिंद्रा थार, चांदीची गदा आणि २ लाख ५१ हजार रुपये मिळतील. उपविजेत्याला १ लाख ५१ हजार तर तिसऱ्या क्रमांकाच्या विजेत्याला १ लाख ५१ हजार रुपये मिळतील. महिला गटात प्रथम क्रमांकासाठी २ लाख ५१ हजार रुपये, ई-बाईक आणि चांदीची गदा, द्वितीय क्रमांकासाठी १ लाख ५१ हजार रुपये व चषक, तर तृतीय क्रमांकासाठी १ लाख रुपये व चषक देण्यात येणार आहे. कुमार गटातील स्पर्धा पुणे शहर आणि जिल्ह्यापुरती मर्यादित असून, विजेत्याला चांदीची गदा व १ लाख रुपये, उपविजेत्याला ५० हजार रुपये व चषक आणि तृतीय क्रमांकासाठी २५ हजार रुपये व चषक मिळतील. १७ व १४ वर्षांखालील गटातील विजेत्यांना सायकल व रोख बक्षिसे दिली जाणार आहेत. महाराष्ट्र राज्य कुस्तीगीर संघ व पुणे जिल्हा कुस्तीगीर संघाच्या मान्यतेने होणाऱ्या या स्पर्धेचे उद्घाटन ७ फेब्रुवारीला सायंकाळी ५ वाजता उपमुख्यमंत्री अजित पवार यांच्या हस्ते होणार आहे. यावेळी उच्च व तंत्र शिक्षण मंत्री चंद्रकांत पाटील आणि क्रीडामंत्री दत्ता भरणे उपस्थित राहणार आहेत. स्पर्धेदरम्यान इराणचे नामवंत मल्ल मिर्झा आणि आली यांचा विशेष सामनाही आयोजित करण्यात आला आहे. या स्पर्धेसाठी स. प. महाविद्यालयात मातीचे दोन स्वतंत्र आखाडे असणार असून जवळपास १० हजार प्रेक्षकांची बसण्याची सोय होईल असे भव्य स्टेडियम उभारण्यात आले आहे. तसेच वाहनांच्या पार्किग साठी मोठी व्यवस्था करण्यात आली आहे. स्पर्धेसाठी येणाऱ्या पुरुष आणि महिला पैलवानांसाठी राहण्याची आणि भोजनाची सोय आयोजकांच्यावतीने करण्यात येणार आहे.महाराष्ट्र केसरीच्या तोडीस तोड ही स्पर्धा आयोजित करण्याचा आमचा प्रयत्न आहे. या स्पर्धेसाठी नामवंत खेळाडू, कलावंत, सामाजिक कार्यकर्ते, राजकीय क्षेत्रातील मान्यवर उपस्थित राहणार असल्याचे धीरज घाटे आणि पुनीत बालन यांनी सांगितले.