पुण्यात दुचाकी चालकाचा पोलिसावर हल्ला:फोनवर बोलत जाणाऱ्याला अडवले, रागाच्या भरात दगडच घातला डोक्यात; आरोपी फरार

पुण्यात गुन्हेगारी दिवसेंदिवस वाढतच जात असल्याचे दिसत आहे. आता तर चक्क एका वाहतूक पोलिसावरच जीवघेणा हल्ला केल्याची घटना समोर आली आहे. फोनवर बोलत दुचाकी चालवणाऱ्या व्यक्तीला रोखल्याने वाहतूक पोलिसावरच प्राणघातक हल्ला केल्याचे समजते. यात वाहतूक पोलिस राजेश गणपत नाईक जखमी झाले असून उपचार सुरू आहेत. ही घटना पुण्यातील फुरसुंगी भेकराईनगर चौकात घडली. पुण्यातील फुरसुंगी भेकराईनगर चौकात राजेश नाईक हे कर्तव्यवर असताना त्यांना एक दुचाकी चालक फोनवर बोलत गाडी चालवताना दिसला. तेव्हा त्यांनी त्याला अडवले. मात्र, याचा राग येऊन दुचाकी चालकाने रस्त्यात पडलेला दगड वाहतूक पोलिस राजेश नाईक यांच्या डोक्यात मारला. यात राजेश नाईक गंभीर जखमी झाले आहेत. सध्या त्यांच्यावर रुग्णालयात उपचार सुरू आहेत. तर आरोपी फरार झाला असून त्याचा शोध पोलिस घेत आहेत. दरम्यान, पुण्यात अशा घटना सातत्याने घडत असल्याचे दिसत आहे. गेल्याच महिन्यात पुण्यातील मगरपट्टा परिसरात 11 जानेवारी रोजी एका युवकाने भररस्त्यात पोलिसाला मारहाण केल्याची घटना घडली होती. यावेळी स्थानिकांनी या तरुणाला पकडून पोलिसांच्या ताब्यात दिले होते. याबद्दल पोलिसांनी दिलेल्या माहितीनुसार, हा तरुण नशेमध्ये होता. तसेच मगरपट्टा या भागात या तरुणाने एका वृद्ध नागरिकाला मारहाण केली होती तसेच रस्त्यावरून जणाऱ्यांना देखील दगड फेकून मारत होता. यावेळी कर्तव्यावर असलेले वाहतूक शाखेचे पोलिस कर्मचाऱ्यांनी या तरुणाला हटकले. याचा राग अनावर झाल्याने या तरुणाने थेट पोलिस कर्मचाऱ्यावरच हल्ला केला. यावेळी जमावाने या तरुणाला पकडले व पोलिसांच्या ताब्यात दिले. दरम्यान, पुण्यात वारंवार होणाऱ्या या घटनांमुळे सामान्य नागरिकांच्या मान्यता देखील भीतीचे वातावरण पसरले आहे. पुण्यात पोलिसच सुरक्षित नसतील तर सामान्य नागरिकांची काय गत? असा सवाल सर्वसामान्य नागरिकांच्या मनात उपस्थित होत आहे.