बडगुजरांच्या विशाल प्रचार रॅलीने दिपले सातपूरकरांचे डोळे

नाशिक | नाशिक पश्चिम मतदारसंघातील महाविकास आघाडीचे उमेदवार सुधाकर बडगुजर यांच्या प्रचारार्थ रविवारी सातपूर परिसरात विराट प्रचार रॅली काढण्यात आली. ढोल-ताशांचा गजर, चार चारचाकी आणि दुचाकी वाहनांचा प्रचंड ताफा आणि उमेदवाराचे चित्र असलेले कटआउट घेतलेले कार्यकर्ते यामुळे रॅलीची रंगत वाढली.

सातपूर कॉलनी, भाजी मार्केट, सातमाउली चौक, बाबासाहेब आंबेडकर पुतळा, जाणता राजा ग्राउंड, श्रमिकनगर, छत्रपती शाळा, मौले हॉल, साईबाबा मंदिर आदी परिसरातून ही रॅली काढण्यात आली. कामगार, युवक आणि महिलावर्गाचा उत्स्फूर्त सहभाग हे रॅलीचे खास वैशिष्ट्य होते. रॅलीचे ठिकठिकाणी जंगी स्वागत झाले. सुधाकर बडगुजर यांनी नाशिकच्या विकासात मोलाचे योगदान दिले असल्याने त्यांना निवडून आणण्याचा निर्धार नाशिक पश्चिम विधानसभा मतदारसंघातील मतदारांनी केला.

नाशिक पश्चिमचा गेल्या अनेक वर्षांपासून विकास खुंटला आहे. भाऊ तुम्हीच या मतदारसंघात विकासगंगा आणू शकता, असा आम्हाला विश्वास वाटतो असे एका मतदाराने काढलेले उद्गार अनेकांच्या काळजात घर करून गेले. सुधाकर भाऊ तुम्ही आमच्यासाठी खूप काही केले. तुम्हाला आमदार म्हणून आम्हाला बघायचे आहे आणि तीच आमच्या दृष्टीने ओवाळणी ठरेल, अशा प्रतिक्रिया महिलांनी दिल्या.

मला विजयी केल्यास नाशिक पश्चिम मतदारसंघाचा मी पूर्ण कायापालट करून दाखवेन. सिडको, सातपूर परिसरात प्रत्येकी 100 बेडचे सुपर स्पेशालिटी हॉस्पिटल उघडण्याचा आपला मानस आहे. बंद कारखाने सुरू करून मोठ्या प्रमाणात रोजगारनिर्मिती तसेच मोठी गुंतवणूक आणून हजारो हातांना काम मिळवून देण्याचा आपण प्रयत्न करू. संपूर्ण मतदारसंघ भयमुक्त करण्यावर आपला भर राहील, असे अभिवचन सुधाकर बडगुजर हे रॅलीच्या वेळी मतदारांशी संवाद साधताना दिले.