बार्शीटाकळी भूमी अभिलेख कार्यालयात वेळ उलटूनही मोजकेच कर्मचारी उपस्थित:कार्यालय सताड उघडे, कुणीही या दस्तऐवज हाताळा अशी स्थिती

तालुक्यातील जनतेच्या स्थावर मालमत्तेचा लेखाजोखा ज्यांची जबाबदारी आहे. त्या भूमी अभिलेख उपअधीक्षक कार्यालयात, कार्यालयीन वेळ उलटूनही मोजकेच कर्मचारी हजर असतात, हे चित्र नित्याचेच झाले आहे. ३० जानेवारी २०२५ रोजी ‘दिव्य मराठी’च्या प्रतिनिधीने या कार्यालयाला भेट दिली असता कार्यालय उघडण्याची वेळ उलटूनही या कार्यालयात मोजकेच कर्मचारी उपस्थित असल्याचे आढळून आले. परिणामी तालुक्यातील बाहेरगावाहून आलेल्या नागरिकांना नाहकच ताटकळत बसावे लागते. कार्यालयात वेळेवर काम होत नसल्यामुळे त्यांचा पूर्ण दिवस या कामात खर्च होतो. त्यामुळे आर्थिक,शारीरिक व मानसिक त्रास सहन करावा लागत आहे. उपअधीक्षकांंचे आपल्या कार्यालयातील कर्मचारी व अधिकारी यांच्यावर नियंत्रण आहे की नाही, असा प्रश्नही या निमित्ताने उपस्थित केला जात आहे. कार्यालयातील कोणत्याही विभागात केव्हाही मुक्तपणे संचार करताना दिसून येतात. त्यातही कळस म्हणजेचं काही बाहेरील व्यक्ती बिनधास्तपणे रेकॉर्ड विभागात दस्तऐवज हाताळतात. यामुळे नागरिकांच्या दस्ताऐवजा सोबत छेडखानी होऊन एखाद्या वेळी मोठा मुद्दा उपस्थित होऊ शकतो. संबंधीत विभागातील वरिष्ठ अधिकाऱ्यांनी याकडे लक्ष देण्याची मागणी नागरिकांकडून होत आहे. कर्मचारी कामानिमित्त बाहेर गेल्याचे सांगतात ः बार्शीटाकळीतील भूमी अभिलेख उपअधीक्षक कार्यालयात १७ अधिकारी, कर्मचारी नियुक्त आहेत. परंतु वेळोवेळी भेट दिली असता मोजकीच उपस्थिती आढळून येते. याबाबत कार्यालय अधीक्षकांना विचारल्यास कर्मचारी मोजणीवर गेलेले आहेत. सुटीवर आहेत. कार्यालयीन कामानिमित्त अकोला गेलेले आहेत, अशी उत्तरे मिळतात. ^बार्शीटाकळी तालुक्यातील शेवटचे गाव म्हणजेच मोऱ्हळ. तेथपर्यंत तालुक्याची सीमा येते. तेथून किंवा अन्य लांबवरच्या गावावरून कार्यालयीन कामासाठी बार्शिटाकळीला यायचे म्हटल्यास संपूर्ण दिवस खर्ची पडतो. आर्थिक भुर्दंड सहन करावा लागतो तो वेगळाच. बार्शिटाकळी शहरातील बहुतांश कार्यालयातील कर्मचारी हे मुख्यालयी न राहता अकोल्याहून ये -जा करतात. परिणामी बऱ्याचदा कर्मचारी निर्धारित केलेल्या वेळेत न येता उशीराने कार्यालयात येतात. तसेच या कार्यालयात दलालांचा वावर वाढला आहे. अमोल जामनिक , नागरिक, बार्शीटाकळी भूमी अभिलेख उपअधीक्षक कार्यालयाला सूचित करू ^भूमी अभिलेख उपअधीक्षक कार्यालयात होत असलेल्या गैर प्रकारास पायबंद घालण्यासाठी उपअधीक्षक भूमी अभिलेख कार्यालय बार्शीटाकळी यांना सूचित करण्यात येईल. - राज वझीरे, तहसीलदार, बार्शीटाकळी.