भूतानच्‍या राजांची 'महाकुंभ'ला भेट, साधला अमृत स्नानाचा 'याेग'

पुढारी ऑनलाईन डेस्‍क : प्रयागराज येथे सुरू असलेल्या कुंभमेळ्यात आज (दि.४) भूतानचे राजे जिग्मे खेसर नामग्याल वांगचुक यांनी संगमात स्नान केले. यावेळी त्‍याच्‍यासमवेत उत्तर प्रदेशचे मुख्‍यमंत्री योगी आदित्‍यनाथ होते. दोघांनी गंगेची पूजा आणि आरती केली. यानंतर वांगचुक यांनी अक्षयवटचे दर्शन घेतले.

भूतानचे राजे वांगचूक हे आज (दि.४) लखनौहून विमानाने बामरौली विमानतळावर पोहोचले. येथे त्‍यांचे उत्तर प्रदेशचे मुख्यमंत्री योगी आदित्यनाथ यांनी स्‍वागत केले. अरैल घाटावरून ते होडीने प्रयागराजमधील संगम घाटावर पोहोचले. येथील संगमात त्‍यांनी स्‍नान केले. यानंतर वांगचूक यांनी योगींसोबत पक्ष्यांना खायला दिले आणि त्यांचा फोटोही काढले.

पंतप्रधान मोदी ५ फेब्रुवारी रोजी महाकुंभाला भेट देतील. यानंतर हेलिपॅड, योगसेना रेल घाट आणि संगम येथील व्यवस्थेची पाहणी करतील. दरम्‍यान, आज महाकुंभाचा २३ वा दिवस आहे. आतापर्यंत ३७ कोटी लोकांनी पवित्र स्‍नान केले आहे.. आज सकाळी १० वाजता ४२ लाख भाविकांनी स्नान केले. सोमवारी वसंत पंचमीनिमित्त २.३३ कोटी लोकांनी स्नान केले आहे. राष्ट्रपती द्रौपदी मुर्मू या १० फेब्रुवारी रोजी प्रयागराज येथे भेट देणार आहेत.