महात्मा फुले विद्यालयाचा‎युवा अभिसरण उपक्रम‎:क्षेत्र भेटीत जाणून घेतली विविध विषयांवरील माहिती

शेंदुरजनाघाट श्री शिवाजी शिक्षण संस्था अमरावती द्वारा संचालित वरुड येथील महात्मा फुले कला, वाणिज्य व सीतारामजी चौधरी विज्ञान महाविद्यालयाद्वारे बुधवारी ५ फेब्रुवारीला अमरावती येथील यशवंतराव चव्हाण सेंटर अंतर्गत युवा अभिसरण उपक्रमाचे आयोजन केले होते. या वेळी यशवंतराव चव्हाण सेंटरचे जिल्हाध्यक्ष हर्षवर्धन देशमुख, डॉ. रमेश अंधारे (कार्याध्यक्ष), डॉ. अंबादास कुलट (सचिव), प्रदीप देशमुख (कोषाध्यक्ष) व महाविद्यालयाचे प्राचार्य डॉ. दिलीप हांडे यांच्या मार्गदर्शनात युवा अभिसरण उपक्रमात सर्व प्रथम महाविद्यालयाच्या वतीने सर्व युवा अभ्यासकांचे स्वागत करून वरिष्ठ व कनिष्ठ महाविद्यालयातील विद्यार्थ्यांशी संवाद घडवून आणला. नंतर वरुड व परिसरातील गव्हाणकुंड येथील ऐतिहासिक, धार्मिक स्थळ कपिलेश्वर मंदिर, सप्तकुंड, शेकदरी धरण, सातपुडा पर्वत, संत्रा उत्पादक शेतकऱ्यांच्या शेतात जाऊन प्रत्यक्ष भेट दिली. धनोडी येथील सरपंच संजय आंडे, ग्रामपंचायत कार्यालय, जि. प. शाळा व मुख्याध्यापक शिवशंकर गोरले, तेथील चार ठिकाणच्या परसबाग योजना व त्या जोपासणाऱ्या अनिता राईकवार आदी ठिकाणी भेट दिल्या. या कार्यक्रमाच्या यशस्वीतेसाठी यशवंतराव चव्हाण सेंटरचे जिल्हा समिती सदस्य डॉ. चत्रभूज कदम, डॉ. प्रियंका बेलसरे यांनी परिश्रम घेतले आहे.