महायुतीच्या उमेदवार सुलभा खोडके यांची ग्वाही:कपिलवस्तू नगरसोबतचा‎ऋणानुबंध जोपासत राहू‎

पाच वर्षाच्या आमदारकीच्या काळात कपिलवस्तू नगरवासीयांची मोलाची साथ लाभली. येथील सामाजिक कार्यप्रसंग, धार्मिक उत्सव व महोत्सवाच्या निमित्ताने मी अनेकदा या भागात आले आहे. परिसरातील जनतेने हाच आशीर्वाद कायम ठेवावा, एक दिवस माझ्यासाठी द्या, पाच वर्षे मी तुमच्यासाठी देईन, असे सांगून महायुतीच्या उमेदवार आमदार सुलभा संजय खोडके यांनी येत्या काळात कपिलवस्तू नगराचा कायापालट करण्याचा मनोदय व्यक्त केला. अमरावती विधानसभा निवडणुकीच्या प्रचारार्थ महायुतीच्या उमेदवार आ. सुलभा खोडके यांची जनआशीर्वाद यात्रा कपिलवस्तू नगरात पोहोचली होती. यावेळी सुलभा खोडके यांचे ढोल-ताशाच्या गजरात, फटाक्यांच्या आतषबाजीत तसेच पुष्पवर्षाव करून स्वागत करण्यात आले. दरम्यान आद्य क्रांतिवीर वस्ताद लहुजी साळवे यांना जयंतीनिमित्त आ. खोडके यांनी अभिवादन केले. मातंग समाजाच्या न्याय हिताचे रक्षण करण्यासाठी आपण कटिबद्ध असून त्यांच्या सामाजिक, आर्थिक विकासाकरिता कार्यान्वित लोकशाहीर अण्णाभाऊ साठे आर्थिक विकास महामंडळाच्या माध्यमातून समाज बांधवांना विविध योजनांचा लाभ मिळण्यासाठी प्रयत्न करणार असल्याचे खोडके यांनी सांगितले.