मुलगा वंशाचा दिवा असेल तर मुलगी ही वंशाची पणती:गोविंद महाराज यांचे प्रतिपादन; सवडद येथे गणेश जयंतीनिमित्त भारूड उत्साहात

आजच्या युगात आजही मुलींना कमी लेखले जात आहे. परंतु मुलगा हा वंशाचा दिवा असेल तर मुलगी वंशाची पणती आहे, असे प्रतिपादन भारुडकार गोविंद महाराज गायकवाड यांनी केले. येथून जवळच असलेल्या सवडद येथील श्री गणेश जयंतीनिमित्त ३१ जानेवारी रोजी भारूडाचा कार्यक्रम सादर करताना ते म्ह‌णाले की, भारत देशात राजा जन्माला येत असे. परंतु प्रत्येकाला मतदानाचा हक्क मिळाल्यापासून लोकशाही अस्तित्वात आली. आता राजा ठरवण्याचा अधिकार आपल्याला आहे. छत्रपती शिवाजी महाराज यांच्या काळात रयतेचे राज्य होते. शेतकरी सुखी समाधानी होता. आज शेतकरी समाधानी नाही. त्यांच्या शेतमालाला योग्य भाव ठरविण्याचा अधिकार त्यांना नाही. नोकरी करणारा मुलगा असेल तर मुलगी त्याला मिळते. शेतकरी मुलगा असेल तर मुलगी मिळत नाही. या देशाचा शेतकरी हा खरा राजा आहे. तो सर्वांचा पोशिंदा आहे. परंतु शेतकऱ्यांची अवस्था आज आपण बिकट केली आहे. मुलगी द्यायची असेल, तर शेतकऱ्यांच्या मुलाला द्या, ती सुखात संसार करेल, मुलगा हा वंशाचा दिवा असला तरी मुलगी ही वंशाची पणती आहे. तिला जपून ठेवा. दान तर प्रत्येक व्यक्ती करतो. परंतु कन्यादान करण्याचे भाग्य लागते, असे प्रतिपादन गोविंद महाराज गायकवाड यानी केले. आजची पिढी तंबाखू व गुटख्याच्या आहारी गेली आहे. मुलगा शाळेतून आल्यानंतर त्याच्या तोंडाचा वास घ्या, आणि तेथेच सरळ करा, असा उपदेश त्यानी केला. तब्बल तीन तास हसत खेळत त्यांनी समाज प्रबोधन केले. यावेळी ठाणेदार गजानन करेवाड, सेवानिवृत्त केंद्रप्रमुख दिलीप खंडारे, बाजार समिती माजी सभापती तेजराव देशमुखा, माजी पंचायत समिती सदस्य अलका जाधव, सरपंच गजानन देशमुख, पत्रकार अशोक इंगळे, उद्योगपती विकास इंगळे, अरुण देशमुख, सेवानिवृत्त मुख्याध्यापक रमेश लोसरे, श्रीकृष्ण तुपकर, गजानन मुंढे, गणेश डोईफोडे यांच्यासह गावकरी मोठ्या संख्येने उपस्थित होते. १ फेब्रुवारी रोजी सकाळी रेणुका जाधव यांचे काल्याचे कीर्तन पार पडले. त्यानंतर प्राचार्य डॉ. बाळासाहेब गावंडे, मुकुंद दंडे, ओमप्रकाश अग्रवाल यांच्या हस्ते महाप्रसादाचे वितरण करण्यात आले. कार्यक्रमाचे संचालन सचिन खंडारे यांनी केले. महोत्सव साजरा करताना भोजराज गाडेकर, रवी अंभोरे व उत्सव समिती सदस्यांचे सहकार्य लाभले.