मोठी बातमी:अशोक मोहिते मारहाण प्रकरणातील आरोपी पोलिसांच्या ताब्यात; वैजनाथ बांगर-अभिषेक सानप यांना कर्नाटकमधून अटक

बीड जिल्ह्यातील मस्साजोग येथील सरपंच संतोष देशमुख हत्या प्रकरणात वाल्मीक कराड संदर्भातील बातम्यांचे व्हिडिओ का पाहतो? या रागातून अशोक मोहिते यांना मारहाण झाल्याची घटना घडली होती. या घटनेत अशोक मोहिते हे गंभीर जखमी झाले होते. या प्रकरणातील आरोपींना ताब्यात घेण्यात धारूर पोलिसांना यश आले आहे. या प्रकरणातील मारहाण करणारे वैजनाथ बांगर आणि अभिषेक सानप या दोघांना धारूर पोलिसांनी कर्नाटक येथून अटक केली आहे. आरोपी वैजनाथ बांगर आणि अभिषेक सानप या दोघांनी संतोष देशमुख हत्या प्रकरणातील फरार आरोपीला वाढदिवसाच्या शुभेच्छा दिल्या होत्या. 'मिस यु भाई' म्हणत त्यांनी स्टेटसला कृष्णा आंधळे याचे फोटो देखील ठेवले होते. या प्रकरणी या दोघांवर पोलिसांनी कारवाई करणार असल्याचे देखील म्हटले आहे. संतोष देशमुख हत्या प्रकरणातील आरोपी असलेला कृष्णा आंधळे अद्याप पोलिसांना सापडलेला नाही. या कृष्णा आंधळे याचेच वैजनाथ बांगर आणि अभिषेक सानप हे दोघे मित्र असल्याचे बोलले जात आहे. अशोक मोहिते यांना मारहाण झाल्यानंतर धारूर पोलिसांनी या दोघांचा तपास करण्यासाठी विशेष पथकाची स्थापना केली होती. या पथकाने अभिषेक सानप आणि वैजनाथ बांगर यांना कर्नाटक मधून अटक केली आहे.