मोलकरणीच्या मुलाने पिस्तुल चाेरून झाडल्या 37 गोळ्या:काेल्हापुरातील घटना, पिस्तूल निवृत्त डीवायएसपीचे

कोल्हापूर जिल्ह्यातील उजळाईवाडी (ता. करवीर) येथे पसरिचानगरमध्ये एका सेवानिवृत्त पोलिस उपअधीक्षकाच्या घरात मोलकरणीच्या १३ वर्षांच्या मुलाने पिस्तूल चोरून हवेत आणि घराच्या भिंतीवर सुमारे ३७ गोळ्या झाडल्या. यामुळे परिसरात भीती पसरली. सुदैवाने फायरिंग होऊनही कोणती दुर्घटना घडली नाही. या घटनेनंतर घटनेमुळे सेवानिवृत्त उपअधीक्षकांचा परवाना रद्द करण्याचा प्रस्ताव करवीरचे पोलिस उपअधीक्षक सुजितकुमार क्षीरसागर यांनी वरिष्ठांकडे पाठवला आहे. उजळाईवाडी येथे राहत असलेले सेवानिवृत्त पोलिस उपअधीक्षक महावीर भाऊ सकळे (६२) यांनी ५१,४०० रुपये किमतीचे जर्मन बनावटीचे ३२ बोअर आर्मिनियस जिवंत गोळ्या लोड असलेले पिस्तूल कपाटात ठेवले होते. कपाटाला लॉक न करता ड्रॉवर उघड्या स्थितीत होते. सकळे यांच्या घरी आईसोबत कामाला आलेल्या अल्पवयीन मुलाने पिस्तूल चोरून घेऊन शुक्रवारी भरदुपारी घराच्या भिंतींवर दोन सहज बार उडवले. अवतीभवती गोंगाट असल्याने बारचा आवाज नागरिकांच्या लक्षात आला नाही. त्यानंतर त्याने आपल्या मित्राला घेऊन माळावर जाऊन हवेत गोळीबार केला. दरम्यान, शहरात विनापरवाना बंदुका किती आहेत, याची आता पाेलिस अधीक्षकांनी चाैकशी सुरू केली आहे. यूट्यूब पाहून मुलगा शिकला बंदूक चालवायला सिनेमा आणि युट्यूबवर पाहून पिस्तूल चालवायला शिकलो असल्याचे त्याने चौकशीवेळी पोलिसांना सांगितले. अल्पवयीन मुलगा आणि त्याचा तेरा वर्षाच्या मित्राने मणेरमळच्या मोकळ्या माळावर जाऊन हवेत व आंब्याच्या झाडाखाली जाऊन हवेत बार उडवले. पिस्तुलाचा आवाज आहे का फटाक्यांचा आवाज हे समजून आले नाही. त्यामुळे कुणीही आक्षेप घेतला नाही. त्यानंतर त्या मुलाने पिस्तूल एका बोळात फेकून दिले होते. त्याने पिस्तुलाचे ३७ राउंड घेतले. त्याने पिस्तुलासोबत ड्रोनदेखील चोरले होते.