रविवार ठरला 'सुपर कॅम्पेन डे'!:खर्गे, शहा, प्रियंका गांधी, कंगनाच्या रोड शो आणि सभांनी गाजवला दिवस

विधानसभा निवडणुकीच्या प्रचाराचा अंतिम टप्पा शुक्रवारी सुरू झाला. मतदानाला दोनच दिवस शिल्लक असल्याने रविवारी उमेदवार व पक्षांनी रोड शो, मिरवणुका, जाहीर सभा आणि पदयात्रांद्वारे अधिकाधिक मतदारापर्यंत पोहोचण्यासाठी "सुपर कॅम्पेन डे' चे नियोजन केले. यात केंद्रीय गृहमंत्री अमित शाह रविवारच्या सभा रद्द करून दिल्लीला निघून गेले. त्यांची रिप्लेसमेंट म्हणून केंद्रीय मंत्री स्मृती इराणी यांनी सभा घेतल्या. काँग्रेस अध्यक्ष मल्लिकार्जुन खर्गे आणि काँग्रेस सरचिटणीस प्रियांका गांधी यांनी रविवार गाजवला. काँग्रेस अध्यक्ष मल्लिकार्जुन खर्गे यांनी सकाळी ११ वाजता उमरेडमध्ये सभा घेतल्या नंतर लगेच कोल्हापूरला रवाना झाले. ते दुसऱ्यांदा जिल्ह्यात आले. काँग्रेसचे प्रदेशाध्यक्ष नाना पटोले यांच्या भंडारा, गोंदियात सभा झाल्या. केंद्रीय गृहमंत्री अमित शहा यांची दुपारी पावणेबारा वाजता गडचिरोली तर, १२.३५ वाजता वर्धा येथे सभा होती. यानंतर त्यांची काटोल येथे चरणसिंग ठाकूर आणि नंतर सावनेर येथे डॉ. आशिष देशमुख यांच्या प्रचारार्थ सभा होणार होती. मात्र दौरा रद्द करून अचानक ते दिल्लीला निघून गेले. केंद्रीय मंत्री नितीन गडकरी यांच्या पश्चिम महाराष्ट्र व मुंबईत सभा झाल्या. प्रियांका गांधी यांचे येथे विशेष विमानाने आगमन होताच लगेच हेलिकॉप्टरने गडचिरोली जिल्ह्यातील वडसा देसाईगंज येथे जाहीर सभेसाठी रवाना झाल्या. दुपारी १२.१५ ते १.१५ वाजेपर्यंत एक तास त्या सभेस उपस्थित राहिल्या नंतर हेलिकॉप्टरने नागपूरला आमगन झाले. प्रियांका गांधी यांनी सव्वादोन तासांत तीन रोड शो केले. २ वाजून ५ मिनिटांनी विमानतळापासून रोड शो प्रारंभ झाला. यानंतर २.३० वाजता तब्बल सव्वा तासाचा दुसरा रोड शो झाला. ३.५० वाजता तिसरा रोड शो झाला. पश्चिम नागपुरात अहबाब कॉलनी, चोपडे लॉन, जाफरनगर, दिनशॉ फॅक्टरी मार्गे बोरगाव चौकात समारोप होणार झाला. मध्य नागपुरात बंटी शेळके यांच्यासाठी गांधी गेट येथून रोड शो झाला. प्रियांका गांधी ४.३० वाजता दिल्लीला रवाना झाल्या. राजस्थानचे मुख्यमंत्री भजनलाल शर्मा यांचा सायंकाळी ७ वाजता राजस्थानी मेळावा तर रात्री ८ वाजता पश्चिम नागपुरात जाहीर सभा झाली. अभिनेते विवेक ओबेराय यांनी प्रवीण दटके यांच्यासाठी मध्य नागपुरात रोड शो केला. अभिनेत्री खासदार कंगना रनौट यांचा पश्चिमचे सुधाकर कोहळे यांच्या प्रचारार्थ दुपारी १ वाजता लॉ कॉलेज चौकातून रोड शो झाला.