'रोबोराष्ट्र-2025' स्पर्धेचा शुभारंभ:देशभरातील 101 संघांचा सहभाग, कृत्रिम बुद्धिमत्ता क्षेत्रात भारत जागतिक स्तरावर अग्रेसर ठरणार - सुनील मेहता

पिंपरी चिंचवड कॉलेज ऑफ इंजिनिअरिंग ॲण्ड रिसर्च (पीसीसीओईआर) येथे आयोजित 'रोबोराष्ट्र-२०२५' या राष्ट्रीय स्तरावरील स्पर्धेला उत्स्फूर्त प्रतिसाद मिळाला आहे. मित्सुबिशी इलेक्ट्रिक इंडियाच्या ग्राहक सेवा विभागाचे व्यवस्थापक सुनील मेहता यांच्या हस्ते स्पर्धेचे उद्घाटन करण्यात आले. कृत्रिम बुद्धिमत्ता आणि रोबोटिक्स क्षेत्रात भारताची वाटचाल वेगवान असून, येत्या काही वर्षांत या क्षेत्रात भारत जागतिक पातळीवर अग्रस्थानी असेल, असा विश्वास मेहता यांनी व्यक्त केला. विशेषतः विविध तांत्रिक क्षेत्रांमध्ये कृत्रिम बुद्धिमत्तेच्या वापराकडे भारतीयांचा वाढता कल हे याचे द्योतक आहे. स्पर्धेत यंत्रोत्सव कनिष्ठ, वरिष्ठ गट आणि रेस्क्युलंपिक असे तीन विभाग ठेवण्यात आले असून, विजेत्यांना दोन लाख रुपयांपर्यंतची पारितोषिके दिली जाणार आहेत. देशभरातील विविध शाळा आणि महाविद्यालयांमधून १०१ संघांनी सहभाग नोंदवला आहे. कार्यक्रमाला मित्सुबिशी इलेक्ट्रिक इंडियाच्या सेंटर ऑफ एक्सलन्सचे प्रमुख राजेंद्र महाजन, पीसीईटी प्लेसमेंट विभागाचे अधिष्ठाता डॉ. शीतलकुमार रवंदळे, डीआरडीओच्या डीआयएटीमधील प्रा. डॉ. सौम्या एस., आदी मान्यवर उपस्थित होते. राजेंद्र महाजन यांनी कृत्रिम बुद्धिमत्ता आणि रोबोटिक्सचा वापर सर्वसामान्यांच्या जीवनमानात सुधारणा आणि सामाजिक विकासाला चालना देईल, असा विश्वास व्यक्त केला.