लष्कर परिसरात विद्यार्थ्याला लुटले:दोन चोरट्यांनी चाकूचा धाक दाखवून1200 रुपये केले लंपास

लष्कर परिसरात एका महाविद्यालयीन विद्यार्थ्यास चोरट्यांनी धारदार चाकूचा धाक दाखवून त्याच्याकडील रोख रक्कम लुटली. याबाबत युवकाने लष्कर पोलिस ठाण्यात फिर्याद दिली आहे. याप्रकरणी अज्ञात चोरट्यांविरुद्ध गुन्हा दाखल करण्यात आला. तक्रारदार याने दिलेल्या फिर्यादीनुसार, दोन चोरट्यांविरुद्ध याबाबत लूटमारीचा गुन्हा दाखल करण्यात आला आहे. पोलिसांनी दिलेल्या माहितीनुसार, तक्रारदार युवक लष्कर भागातील एका महाविद्यालयात शिक्षण घेत आहे. तो 3 फेब्रुवारी रोजी सकाळी पावणेसहाच्या सुमारास पूना काॅलेज परिसरातून दुचाकीवरुन जात होता. पूना काॅलेज परिसरातील रस्त्यावर दोन चोरट्यांनी त्याला अडविले. त्याला चाकूचा धाक दाखवून जिवे मारण्याची धमकी दिली. युवकाला मारहाण करुन खिशातील 1200 रुपयांची रक्कम लुटून चोरटे पसार झाले. पोलिस उपनिरीक्षक राहुल घाडगे पुढील तपास करत आहेत. पानटपरी चालकाला लुटणारा सराइत अटकेत पुणे रेल्वे स्थानक परिसरात पानटपरी चालकाला कोयत्याचा धाक दाखवून गल्ल्यातील पाच हजारांची रोकड लुटणाऱ्या सराइताला बंडगार्डन पोलिसांनी अटक केली. आनस खान (वय 24, रा. चुडामण तालीम, भवानी पेठ) असे अटक करण्यात आलेल्याचे नाव आहे. याबाबत जुनैद निहाल खान (वय 24, रा. साईबाबानगर, कोंढवा) याने फिर्याद दिली आहे. जुनैद याची पुणे रेल्वे स्थानक परिसरात पानपट्टी आहे. आरोपी आनस पानपट्टीत आल्यावर त्याने कोयत्याचा धाक दाखवून जुनैदला जिवे मारण्याची धमकी दिली. गल्ल्यातील पाच हजारांची रोकड लुटली. शेजारी असलेल्या एका टपरी चालकाला धमकावून त्याच्याकडे पैसे मागितले. त्याने एका कारची काच फोडून परिसरात दहशत माजविली. पोलिस उपनिरीक्षक संदीप खेडकर तपास करत आहेत.