लाडकी बहिण योजनेचा लाभ घेणाऱ्या औंढ्यातील भावांना नोटीस:महिला बालविकास विभागाकडून रकमेचा भरणा करण्याचा सूचना

मुख्यमंत्री लाडकी बहिण योजनेचा गैरमार्गाचा अवलंब करून लाभ घेतलेल्या औंढा नागनाथ तालुक्यातील चार लाडक्या भावांना महिला बालविकास विभागाने नोटीस पाठवली असून या योजनेतून उचल केलेली रक्कम तातडीने जमा करण्याच्या सूचना दिल्या आहेत. मुख्यमंत्री लाडकी बहिण योजनेमध्ये हिंगोली जिल्ह्यातून सुमारे 3.50 लाख महिलांचे अर्ज प्राप्त झाले होते. या सर्व महिलांचे अर्ज मंजूर करून त्यांच्या बँक खात्यावर दर महा 1500 रुपयांची रक्कम जमा करण्यात आली आहे. आता निवडणुकीनंत ज्या महिलांना या योजनेचा लाभ बंद करावयाचा आहे त्यांनी रितसर अर्ज सादर करण्याचे आवाहन शासनाकडून करण्यात आले होते. त्यानुसार हिंगोली जिल्हयातील आठ जणांनी योजनेचा लाभ बंद करण्याचा अर्ज सादर केला. यामध्ये चार लाडक्या भावांचाही समावेश असल्याचे उघड झाले होते. आधारकार्डवर महिलांचे छायाचित्र लाऊन त्यांनी योजनेत प्रस्ताव सादर केल्याचे स्पष्ट झाले. याप्रकारानंतर खडबडून जागे झालेल्या महिला व बालकल्याण विभागाने धावपळ करून त्या लाडक्या भावांची माहिती घेण्यास सुरवात केली. यामध्ये सदर भाऊ औंढा तालुक्यातील असून त्यांनी सहा हप्ते उचलल्याचे स्पष्ट झाले. याप्रकरणात जिल्हाधिकारी अभिनव गोयल यांनी चौकशीचे आदेश दिले आहे. त्यानुसार महिला व बालविकास विभागाने लाडकी बहिण योजनेत लाडके भाऊ कसे आले याची चौकशी सुरु केली आहे. या शिवाय या चार लाडक्या भावांना नोटीस पाठवली असून त्यांनी आता पर्यंत उचल केलेल्या सहा हप्त्यांची प्रत्येकी नऊ हजार रुपयांची रक्कम चलनाद्वारे शासनखाती जमा करावी अन्यथा कायदेशीर कारवाई करण्याचा इशारा दिला आहे. दरम्यान, नोटीस हाती पडताच लाडक्या भावांचे अवसान गळाले असून त्यांनी आता सदर रक्कम तातडीने भरणा केली जाईल असे महिला व बालविकास विभागाच्या अधिकाऱ्यांना सांगितले आहे.