व्यापाऱ्याच्या जीएसटी क्रमांकासाठी 5 हजारांची लाच मागितली:कर निरीक्षकाला एसीबीने घेतले ताब्यात

पुण्यातील वस्तू आणि सेवा कर (जीएसटी) कार्यालयातील कर निरीक्षकाला पाच हजार रुपयांची लाच घेताना लाचलुचपत प्रतिबंधक विभागने सापळा रचून जेरबंद केले आहे. तुषारकुमार दत्तात्रय माळी (वय 33) असे लाचखोर कर निरीक्षकाचे नाव आहे.याप्रकरणी कर निरीक्षकाविरुद्ध भ्रष्टाचार प्रतिबंधक अधिनियमान्वये येरवडा पोलिस ठाण्यात गुन्हा दाखल करण्यात आला. याप्रकरणी तुषार कुमार माळी यांच्याविरुद्ध भ्रष्टाचार प्रतिबंधक अधिनियमान्वये गु्न्हा दाखल करण्यात आला आहे. याबाबत एका वकिलाने लाचलुचपत प्रतिबंधक विभागाकडे (एसीबी) तक्रार दिली होती. तक्ररादार वकिलाचा अशील व्यापारी आहे. व्यापाऱ्याचा जीएसटी क्रमांक रद्द करण्यात आला होता. जीएसटी क्रमांक मिळवण्यासाठी वकिलाने अशिलामार्फत जीएसटी कार्यालयात अर्ज दाखल केला होता. माळी याने वकिलाकडे पाच हजार रुपयांची लाच मागितली. त्यानंतर वकिलाने याबाबत एसीबीकडे तक्रार दिली. लाचलुचपत प्रतिबंधक सापळा लावून वकिलाकडून पाच हजारांची लाच घेणाऱ्या माळी यांना पकडले.पोलिस अधीक्षक शिरीषकुमार सरदेशपांडे, अतिरिक्त अधीक्षक डाॅ. शीतल जानवे यांच्या मार्गदर्शनाखाली ही कारवाई करण्यात आली. पोलिस निरीक्षक प्रसाद लोणारे पुढील तपास करत आहेत. भाजी मंडईत ग्राहकाकडून भाजी विक्रेत्यावर चाकूने वार खडकी बाजारात भाजी खरेदी करताना झालेल्या वादातून एका ग्राहकाने भाजी विक्रेत्यावर धारदार चाकूने वार केल्याची घटना खडकीतील संजय गांधी भाजी मंडईत घडली आहे. भाजी विक्रेत्याचा खुनाचा प्रयत्न केल्याप्रकरणी ग्राहक विरुध्द खडकी पोलिसांनी गुन्हा दाखल केला. मनोज स्वामी (रा. इंदिरानगर, खडकी) असे गु्न्हा दाखल झालेल्या आराेपीचे नाव आहे. आरोपीने केलेल्या हल्ल्यात भाजी विक्रेते शौकत बाबामियाँ (वय 36, रा. दर्गा वसाहत, खडकी) गंभीर जखमी झाले आहेत. त्यांच्यावर रुग्णालयात उपचार सुरू असल्याची माहिती पोलिसांनी दिली.पोलिसांनी दिलेल्या माहितीनुसार, शौकत बाबामियाँ यांचा खडकीतील संजय गांधी भाजी मंडईत भाजी विक्री व्यवसाय आहे. आरोपी मनोज स्वामी मंगळवारी रात्री साडेआठच्या सुमारास भाजी खरेदीसाठी आला होता. भाजी खरेदी करताना आरोपी स्वामीने त्यांच्याशी वाद घालून शिवीगाळ केली. बाचाबाचीतून त्याने गाळ्यावरील धारदार चाकूने शौकत यांचा गळा आणि चेहऱ्यावर चाकूने वार केला. गंभीर जखमी झालेल्या शौकत यांना मंडईतील भाजी विक्रेत्यंनी रुग्णालयात दाखल केले. आरोपी पसार झाला असून, सहायक पोलिस निरीक्षक अर्जुन बेंदगुडे पुढील तपास करत आहेत.