शिकारीच्या शोधात बिबट्याचा बछडा पडला शेतातील विहिरीत:मालधूर शिवारातील घटना; वन विभागाच्या पथकाने काढले बाहेर

शिकारीच्या शोधात असताना विहिरीत पडलेल्या बिबट्याला वाचवण्यात वन विभागाला यश आले. तिवसा तालुक्यातील मोझरी लगतच्या मालधूर येथील एका शेतशिवारातील विहिरीत ही घटना रविवारी सकाळी ९.३० वाजताच्या सुमारास घडली. मालधूर येथील अरविंद साबळे यांच्या शेतात तूर पीक काढणीचे काम सुरू आहे. अशातच शेतात कामावर असलेल्या मजुरांना रविवारी सकाळी ९.३० वाजताच्या सुमारास साबळे यांच्या शेत शिवारातील विहिरीत एक बिबट असल्याचे दिसून आले. त्यांनी लगेच ही माहिती मोझरी येथील सरपंच सुरेंद्र भिवगडे यांच्या सहकार्याने वन विभागाला दिली. वन विभागाचे अधिकारी घटनास्थळी दाखल झाले. तालुक्यात वन्य प्राण्यांच्या बचावासाठी यादरम्यान एक पथक तयार करण्यात आले. विहिरीत काठाला बसलेल्या बिबट्याच्या बछड्याला जाळी व पिंजरा टाकून बाहेर काढण्यात आले. वन विभागाने टाकलेल्या पिंजऱ्यात सुरक्षित बिबट कैद झाल्याचे दिसून येताच घटनास्थळी उपस्थित मजूर व गावकऱ्यांनी सुटकेचा श्वास सोडला. या बिबट्याची वन परिक्षेत्र चांदूर रेल्वे येथे नोंद करून त्याला वैद्यकीय चाचणी करण्यासाठी नेण्यात आले. वन विभागाने पिंजऱ्यात कैद केलेल्या बिबट्याला सुखरूप चांदूर रेल्वे येथील जंगलात सोडण्यात येणार असल्याची माहिती वनपरिक्षेत्र अधिकारी भानुदास पवार, वनपाल सोमेश्वर घोरमाडे यांनी दिली. तिवसा व चांदूर रेल्वे वन परिक्षेत्र विभागातील वन अधिकारी, वनरक्षकांसह बचाव पथकाने बिबट्याला विहिरीतून बाहेर काढले. शिकारीच्या शोधात हा बिबट्याचा बछडा विहिरीत पडला असावा, असा प्राथमिक अंदाज वन विभागाने व्यक्त केला. पिंजरा, जाळीच्या मदतीने बछड्याला बाहेर काढले ^मालधूर येथील शेतशिवारातील विहिरीत बिबट असल्याची माहिती मिळताच तिवसा व चांदूर रेल्वे विभागातील वन विभागाचे बचाव पथक घटनास्थळी दाखल झाले. पिंजरा व जाळीच्या मदतीने विहिरीत असलेल्या बिबट्याच्या बछड्याला कैद करण्यात वन विभागाला यश आले आहे. -सोमेश्वर घोरमाडे, वनपाल, तिवसा.