श्री विठ्ठल-रुक्मिणी विवाह सोहळा थाटात

पंढरपूर : वसंत पंचमीच्या शुभ मुहूर्तावर रविवारी (दि.2) श्री विठ्ठल व श्री रुक्मिणी मातेचा विवाह सोहळा परंपरेनुसार श्री विठ्ठल सभा मंडप येथे सजविलेल्या मंडपात झाला. सनई, चौघडे सप्तसुरांच्या साथीने दुपारी 12 वाजता अक्षता पडल्या. दिवसभर वर्‍हाडी मंडळींसाठी जेवणावळीच्या पंगती सुरू होत्या. या पंढरपुरात काय वाजत गाजत, सोन्याचं बाशिंग लगीन देवाचं लागतं, असे सूर कानावर पडत असल्यामुळे भाविक तल्लीन झाले होते.

सकाळी श्री विठ्ठल रुक्मिणीमातेला शुभ्र वस्त्र तसेच श्री रुक्मिणी मातेस मोत्याचे दागिने, नथ आणि अलंकार परिधान करण्यात आले होते. श्री रुक्मिणी मातेच्या गर्भगृहातून गुलाल विठ्ठलाकडे नेण्यात आला. तिथे गुलालाची उधळण केल्यानंतर श्री विठ्ठलाचा गुलाल रुक्मिणी मातेकडे नेण्यात आला. तिथेही गुलालाची उधळण करण्यात आली.

दुपारी 12 वाजता श्री. विठ्ठल रूक्मिणीमातेची पाद्यपुजा सहअध्यक्ष गहिनीनाथ महाराज औसेकर, सदस्य ह.भ.प. ज्ञानेश्वर देशमुख जळगावकर, संभाजी शिंदे, व्यवस्थापक मनोज श्रोत्री, लेखा अधिकारी मुकेश अनेचा यांच्या हस्ते पार पडली. त्यानंतर श्री विठ्ठल व श्री रुक्मिणी मातेची अलंकाराने सजवलेली उत्सवमूर्ती या विवाह सोहळ्याच्या ठिकाणी म्हणजे श्री विठ्ठल सभामंडपातील फुलांनी सजविण्यात आलेल्या शाही मंडपात आणण्यात आली. दोन्ही देवतास मुंडावळ्या बांधून आणल्या गेल्या. यानंतर अंतरपाट धरले आणि मंगलाष्टकास सुरवात झाली. त्यामध्ये मंदिर समितीचे सहअध्यक्ष गहिनीनाथ महाराज औसेकर यांनी मंगलाष्टका म्हटली. मंगलाष्टक झाल्यावर सर्व उपस्थित भाविकांनी शाही विवाह सोहळा साजरा केला.

यावेळी मंदिर समितीमार्फत संत तुकाराम भवन येथे भोजनाची व्यवस्था करण्यात आली होती. विवाह सोहळा पार पडल्यानंतर मोठ्या प्रमाणात भाविकांनी या महाप्रसादाचा लाभ घेतल्याची माहिती मंदिर समितीचे व्यवस्थापक मनोज श्रोत्री यांनी दिली.

लग्नासाठी आलेल्या वर्‍हाडी मंडळींसाठी गुलाब जामून, बालुशाही, गोड बुंदी, शिरा, वांग्याची भाजी, पुलाव, डिस्कोवडा, पापड, जिलेबी इत्यादी पदार्थ होते. सिलबंद शुद्ध पाणी भाविकांना पुरवण्यात आले.