संगीत कारंजांचे आकर्षण, पर्यटकांचा ओढा वाढला:हाॅटेल व्यावसायिकांना सुगीचे दिवस, पैठणीलाही गतवैभव प्राप्त हाेणार‎

पैठण पाच वर्षांनंतर पैठण येथील संत ज्ञानेश्वर उद्यान सुरू झाल्याने या चार दिवसांत पैठण शहरात दहा हजारच्यावर पर्यटकांनी हजेरी लावली आहे, तर पर्यटकांचा ओघ वाढला असल्याचे कार्यकारी अभियंता प्रशांत जाधव, अभियंता दीपक डोंगरे, तुषार विसपुते यांनी सांगितले. शनिवार, रविवार सुटीच्या दिवशी पर्यटक मोठ्या प्रमाणात पैठण शहरात दाखल होत आहेत. एकूणच उद्यान सुरू झाल्याने ओघाने पर्यटकांची संख्या वाढली असून यामुळे हॉटेल व्यवसायाला पुन्हा सुगीचे दिवस आले असून आता पैठणी साडीला देखील गतवैभव प्राप्त होईल, अशी अपेक्षा स्थानिकांना लागली आहे. संत ज्ञानेश्वर उद्यान बंद असल्याने गेल्या काही वर्षांत येथे पर्यटकांचा ओघ जवळपास बंदच झाला होता. त्याचा परिणाम पैठणी साडीवर दिसून आला. तीच पैठणी येवला पैठणीच्या रुपाने येवल्यात बहरत असताना पुन्हा पैठणचे उद्यान सुरू झाल्याने पैठणीकडे आपसुकच ओढा वाढणार, आता पैठणी साडीला पुन्हा चांगले दिवस येतील, असे पैठणीचे विक्रेते बाळू आहेर यांनी सांगितले. पुढील महिन्यात उन्हाळी हंगाम सुरू होईल तेव्हा जास्त पर्यटक येथे येतील असा अंदाज आहे. आता बाराही महिने असणार पर्यटक संत ज्ञानेश्वर उद्यान सुरू झाल्याने वर्षाचे बाराही महिने देखील पर्यटक येथे येतील. त्यात जर जोडून सुटी मिळाली तर पर्यटकांची संख्या जास्त असते. आता उन्हाळी हंगाम सुरू झाल्यावर अधिक पर्यटक येतात. यंदा महाराष्ट्रातून पर्यटक संख्या वाढेल, असे व्यापारी महासंघाचे माजी अध्यक्ष लोहिया, बलराम लोळगे यांनी सांगितले. सुविधांसाठी आमदारांना साकडे घालणार ^पैठण हे ऐतिहासिक धार्मिक ठिकाण असून आता संत ज्ञानेश्वर उद्यान सुरू झाल्याने येथे महाराष्ट्रासह देशातून पर्यटक येतील, असे नियोजन करण्यात यावे. खासदार भुमरे व आमदार विलास बापू भुमरे यांच्याकडे आम्ही पर्यटक कसे वाढतील यासाठी आणखी सुविधा उपलब्ध करुन देण्याची मागणी करणार आहोत.- तुषार पाटील, शहराध्यक्ष शिवसेना (शिंदे गट)