संजय शिरसाट काय म्हणतात त्याला महायुतीमध्ये काही महत्त्व नाही:योगेश कदम, म्हणाले- पक्षाच्या निर्णयाचे सर्व अधिकार एकनाथ शिंदेंना

शिवसेनेची भूमिका हे आमचे मुख्यनेते एकनाथ शिंदे ठरवतात. संजय शिरसाट काय म्हणतात याला महायुतीत महत्त्व नाही. ते त्यांचे वैयक्तिक मत आहे, असे शिवसेना नेते योगेश कदम यांनी म्हटले आहे. योगेश कदम पुढे बोलताना म्हणाले की, एकनाथ शिंदे यांनी जो उठाव केला, त्यावेळी आम्ही पक्षाच्या निर्णयाचे सर्व अधिकार एकनाथ शिंदेंना दिले. इतर कुणालाही अधिकार दिले नाहीत. ठाकरे गटाचे आमदार आमच्या संपर्कात योगेश कदम म्हणाले की, उबाठाचे अनेक आमदार आमच्या संपर्कात आहेत. आम्हाला आमच्या आमदारांची विंता नाही ते सोबतच आहेत. उबाठाच्या आमदारांना खरंतर निधी कुठून मिळणार आहे? पुढच्यावेळी निवडून कसे येणार? ही चिंता भेडसावत आहे. आम्ही सत्तेत आहोत. एकनाथ शिंदे उपमुख्यमंत्री आहेत. त्यांच्या पाठी सर्व आमदारांची एकजूट आहे. त्यामुळे आम्हाला कसलीही चिंता नाही. त्यांचा संजय राऊत होऊ नये एवढीच अपेक्षा- राणे नीतेश राणे म्हणाले की, संजय शिरसाट यांनी केलेले विधान हो ठीक आहे, तसे प्रयत्न करत रहावेत. पण त्या बद्दल एकनाथ शिंदे आणि अन्य आमदारांचे काय मत आहे, याबद्दल त्यांनी विचार करावा, असा सल्ला नीतेश राणे यांनी संजय शिरसाटांना दिला. तसेच ते आमचे मित्र आहेत. फक्त त्यांचा संजय राजाराम राऊत होऊ नये एवढीच अपेक्षा आहे, असा टोलाही राणे यांनी लगावला आहे. संजय शिरसाट यांचे वक्तव्य काय? संजय शिरसाट म्हणाले होते की, आता जोडण्याची वेळ आली आहे. संधी मिळाल्यास मी उद्धव ठाकरे आणि एकनाथ शिंदेंना एकत्र आणण्याचा प्रयत्न करणार आहे. मात्र प्रयत्न एका बाजूने करून चालणार नाही. आमच्या चुका तुम्ही माफ केल्या पाहिजेत, तुमची चूक आम्ही माफ केली पाहिजे. तसे झाले तर दोन्ही शिवसेना एकत्र यायला हरकत नाही. शिरसाटांच्या या वक्तव्याने एकच खळबळ उडाली. पण शनिवारी शिरसाटांनी कोलांटउडी मारली. ते म्हणाले की, माझ्या वक्तव्याचा वेगळा अर्थ काढण्यात आला. शिवसेना फुटू नये या मताचे आम्ही होतो. पण आता पुलाखालून पाणी फार वाहून गेले आहे. आता दोन्ही शिवसेना एक येणे शक्य नाही.