सरकार कुणाचे का असेना,पाया पडत विनंती करून माढ्यासाठी निधी आणणार:विजयी सभेत माढ्यात अभिजित पाटील यांचे मतदारांना विकासकामांचे आश्वासन

सरकार कुणाचे का असेना, पाया पडत विनंती करून निवडणुकीत मांडलेले विकासाचे व्हिजन पूर्ण करण्यासाठी निधी खेचून आणणार असून, निधीची कमतरता भासू देणार नाही. माढ्यातील जनतेने ३० हजारांचा धपका दिलाय, जनतेचे उपकार कधीच विसणार नाही, असा शब्द आमदार अभिजित पाटील यांनी माढ्यात दिला. शनिवारी विजयी मिरवणुकीनंतर आमदार पाटील बोलत होते. कुर्डुवाडीतील मतमोजणी केंद्रापासून ते माढ्यापर्यंत त्यांची विजयी मिरवणूक काढण्यात आली. माढ्यात मिरवणूक येताच श्री माढेश्वरी देवीचे दर्शन घेतले. त्यानंतर टेम्पोवर उभारून पाटील यांनी हात जोडून शहरातील मतदारांचे आभार मानले. छत्रपती शिवाजी महाराज चौकात मिरवणूक पाटील यांनी सभेत मतदारांचे आभार मानत कृतज्ञता व्यक्त केली. छत्रपती शिवाजी महाराज चौकात जेसीबीमधून फुलांचा वर्षाव त्यांचेवर करण्यात आला. क्रेनच्या सहाय्याने भला मोठा हार घालून देखील त्यांचा सत्कार करण्यात आला. या वेळी माढ्याचे माजी उपसरपंच राजाभाऊ चवरे, नगरसेवक शहाजी साठे, गुरुराज कानडे, दिनेश जगदाळे, आबासाहेब साठे, शंभूराजे साठे यांच्यासह शहरातील मतदार, कार्यकर्ते मिरवणुकीत सहभागी झाले होते. तुमच्या कामासाठी आठवड्यातून दोन दिवस माढ्यात राहीन या वेळी आमदार पाटील म्हणाले, निवडणुकीच्या अगोदर प्रचार काळात दिलेल्या आश्वासनाची पूर्तता करुन प्राधान्याने दाखवली जाईल. छत्रपती शिवाजी महाराजांचा अश्वारूढ पुतळा तसेच अन्य महापुरुषांची स्मारके करण्यासाठी माझा पुढाकार असेल. माढा शहराला पाणीपुरवठा, क्रीडा संकुल यासह सिंचनाच्या योजना प्रलंबित आहेत त्या पूर्ण करण्यासाठी प्रथम प्रयत्न असेल. माझी भेट घेण्यासाठी पंढरपूरला येण्याची गरज भासणार नाही. मी आठवड्यातून दोन दिवस माढ्यातच राहायला असेन