सराफ बाजारात धक्कादायक घटना:पत्ता विचारण्याच्या बहाण्याने २० लाखांच्या दागिन्यांची चोरी; दोन अज्ञात आरोपींविरुद्ध गुन्हा दाखल

पुण्यातील रविवार पेठेतील मोती चौक परिसरात एका सराफ कारागिराकडून २० लाख रुपयांचे दागिने चोरीची धक्कादायक घटना घडली आहे. पश्चिम बंगाल मूळ निवासी असलेल्या २३ वर्षीय चिरनजीत अंबिका बाग या तरुणाकडून दोन अनोळखी व्यक्तींनी पत्ता विचारण्याच्या बहाण्याने १९ लाख ९४ हजार रुपयांचे सोन्याचे दागिने असलेली पिशवी हिसकावून पळ काढला. घटना रविवारी दुपारी पुष्पम ज्वेलर्सच्या समोर घडली. चिरनजीत हा सराफ बाजारातील एका कारागिराकडे काम करतो. त्याच्याकडे विक्रीसाठी तयार केलेले दागिने होते. मोती चौकातील पदपथावरून जात असताना दोन अनोळखी व्यक्तींनी त्याला अडवले आणि पत्ता विचारण्याच्या बहाण्याने त्याला बोलण्यात गुंतवून त्याच्याकडील पिशवी हिसकावून दुचाकीवरून पळून गेले. घटनेची माहिती मिळताच पोलीस उपायुक्त संदीपसिंह गिल, सहायक आयुक्त अनुजा देशमाने आणि वरिष्ठ पोलीस निरीक्षक प्रशांत भस्मे यांनी घटनास्थळी भेट दिली. पोलिसांनी परिसरातील सीसीटीव्ही फुटेज तपासले असून आरोपींचा शोध सुरू आहे. फरासखाना पोलीस ठाण्यात गुन्हा दाखल करण्यात आला असून सहायक पोलीस निरीक्षक प्रतिक्षा शेंडगे या पुढील तपास करत आहेत.