सहा महिन्यांपूर्वी केलेला 12 किमी रस्ता पाइपलाइनसाठी पुन्हा खोदला:रोडवरील चितेगाव, ढोरकीन, बिडकीनच्या नागरिकांचे आरोग्य धोक्यात

पैठण-छत्रपती संभाजीनगर रस्त्याच्या चौपदरीकरणाच्या कामाची मुदत काही दिवसांत संपत आहे. आता संभाजीनगरच्या समांतर पाइपलाइनमुळे अनेक ठिकाणी काम ठप्प झाले आहे. आता ते कधी पूर्ण होणार याची शाश्वती नॅशनल हायवेच्या अधिकाऱ्यांना देखील नाही. यात मात्र चितेगाव, ढोरकीन, बिडकीनमध्ये फक्त रस्ता खोदून ठेवला असून या ठिकाणी ना पाइपलाइनचे काम पूर्ण होईना ना रस्त्याचे काम पूर्ण होईना. यात रोज हजारो नागरिकांना या ठिकाणाहून प्रवास करताना प्रचंड धुळीचा सामना करावा लागत आहे. या विरोधात दि. ५ फेब्रुवारीला शिंदेसेनेच्या वतीने आंदोलन करणार असल्याचा इशारा दिला आहे. मागील दीड वर्षात केवळ ४२ पैकी ३२ किलोमीटरपर्यंत काम पूर्ण झाले, परंतु त्यानंतर पाइपलाइनसाठी पुन्हा रस्ते खोदून कामे सुरू करण्यात आली, परंतु काम अद्याप अपूर्णच आहे. यामुळे नागरिकांचे प्रचंड हाल व वाहतुकीची समस्या निर्माण झाली आहे. ढोरकीन, चितेगाव, बिडकीन या ठिकाणच्या नागरिकांना तर रोजच्या धुळीच्या समस्यांनी श्वासाच्या आजाराला सामोरे जावे लागत आहे. ३० मीटर चौपदरीकरणात ७ मीटरमध्ये छत्रपती संभाजीनगरची पाइपलाइन गेलेली आहे. १७ मीटरमध्ये चौपदरीकरण होत आहे. दोन्ही बाजूंनी साडेआठ मीटरचा रस्ता, १ मीटरचे दुभाजक तर दीड मीटरचे दोन्ही बाजूंनी साइड पंखे असणार आहेत. आता हा रस्ता पाइपलाइनमुळे रखडणार आहे. काम वेळत करण्यात आले नाही, दोन महिन्यांपासून चौपदरीकरणाचे काम सर्व ठिकाणी ठप्प पडले आहे. यात आता राहिलेले ३५ टक्के काम कधी व कोण पूर्ण करणार याचे उतर नँशनल हायवेचे अधिकारी देताना दिसत नाहीत. ३५ टक्के काम अद्यापही अपूर्ण १२ किमी काम झाले तरीही कळले कसे नाही १२ कि.मि काम चौपदरीकरणाचे झाले पाइपलाइन कोठून जाणार तेव्हा का कळले नाहीॽ हा जनतेच्या पैसाची लुट असल्याचा आरोप माजी मंत्री अनिल पटेल यांनी केला आहे. सबंधित ठेकेदार व अधिकारी यांच्यावर गुन्हे दाखल करण्याची मागणी करण्यात येईल असे पटेल यांनी सांगितले. ^चौपदरीकरणाचे काम करताना पाइपलाइनचा विचार न करता रस्ता तयार करण्यात आला होता. आता जवळपास १२ किमी तयार झालेला रस्ता खोदून त्या ठिकाणी पाइपलाइन टाकली जाणार आहे. काही ठिकाणी रस्ता झाला त्या ठिकाणी आता पाइपलाइन टाकली जात आहे. अधिक माहिती हवी असल्यास हायकोर्टाने जी कमिटी नियुक्त केली आहे त्यांच्याकडून अनधिकृत प्रतिक्रिया घ्यावी. -राजेंद्र इंगोले, अधिकारी, नॅशनल हायवे असा असेल पैठणचा चौपदरीकरण रस्ता : कामे उखडून पाइपलाइन करणार