गोळीबाराच्या घटनेने कोल्हापूर हादरले:मोलकरणीच्या 13 वर्षीय मुलाने फटाके उडवल्यासारख्या झाडल्या गोळ्या, अनेक राउंड फायर

एका 13 वर्षीय मुलाने बंदुकीतुन हवेत गोळीबार केल्याची घटना समोर आली आहे. कोल्हापूरात हा धक्कादायक प्रकार घडला. एका सेवानिवृत्त पोलिस अधिकाऱ्याची बंदूक चोरून त्याने हे कृत्य केले. मुलाने दिवसभरात अनेक राउंड फायर केले. सुदैवाने या गोळीबारात कोणतीही जीवितहानी झाली नाही. कोल्हापूरच्या उजळवाडी येथील पसरिचानगरमध्ये गल्लीत आणि मोकळ्या माळ्यावर फटाके उडवल्यासारखे दिवसभर अल्पवयीन मुलाने फायरिंग केले. याप्रकरणी पोलिसांकडून अधिकचा तपास सुरू आहे. या घटनेमुळे परिसरात परिसरात एकच खळबळ उडाली. पसरिचानगरमध्ये सेवानिवृत्त पोलिस अधिकारी महावीर भाऊ सकळे यांच्या घरी मोलकरीण नेहमीप्रमाणे कामाला येत होती. आईला घरकामाला मदत करण्यासाठी अल्पवयीन मुलगा कधी कधी तो जात होता. एकेदिवशी मोलकरीण आपल्या 13 वर्षांच्या मुलाला घेऊन आली. त्यावेळी अधिकाऱ्याची खोल साफ करताना अल्पवयीन मुलाला ड्रॉवर उघडा दिसला. त्याने ड्रॉवरमधील रिव्हॉल्व्हर उचलले. त्यानंतर त्याने घरातच समोरच्या भिंतीवर गोळ्या झाडल्या. मात्र, परिसरात आवाज जास्त असल्याने आणि स्पीकर चालू असल्याने गोळी झाडल्याचा आवाज आला नाही. भरदिवसा 34 पेक्षा जास्त गोळ्या झाडल्या दरम्यान, अल्पवयीन मुलगा मोकळ्या रस्त्यावर गेला अन् फटाके उडवतो त्याप्रमाणे हवेत गोळीबार केला. त्याला मजा येऊ लागल्यावर त्याने माळावर जाऊन हवेत गोळ्या चालवल्या. दिवसभर अनेक वेळा हवेत फायरिंग केल्याचे समोर आले आहे. मालकाला याची माहिती मिळाल्यावर ही धक्कादायक बाब समोर आली. एखाद्याला गोळी लागली असती, तर अनर्थ घडला असता. मात्र भरदिवसा घडलेला हा प्रकार कोणालाच कसा समजला नाही? याबाबत पोलिसही अचंबित झाले आहेत. यूट्यूबवरून बंदूक चालवणे शिकला आपल्या मुलाने रिव्हॉल्व्हर चोरल्याचे मोलकरणीला माहीत नव्हते. दरम्यान, लहान वयात याचे ज्ञान त्याला कसे आले, याची चौकशी पोलिसांनी केली असता आपण बंदुक चालवण्याचे यूट्यूबवरून शिकल्याचे अल्पवयीन मुलाने सांगितले आहे. या घटनेनंतर गोकुळ शिरगाव पोलीस ठाण्याकडून तपास सुरू आहे. तर संबंधित सेवानिवृत्त अधिकाऱ्याच्या पिस्तूलचा परवाना रद्दसाठी प्रस्ताव वरिष्ठांकडे पाठवण्यात आला आहे.