सेंट मोनिका केंद्राचा रस्ता खराब:वाहनांना प्रवेश नाकारल्याने वृद्ध मतदारांना अडथळे

अहमदनगर मतदारसंघातील झोपडी कॅन्टीन परिसरातील सेंट मोनिका कॉलेज येथील मतदान केंद्रातील अंतर्गत रस्त्याची दुरवस्था झालेली असल्याने वृद्ध मतदारांना मतदान केंद्रापर्यंत पोहचण्यासाठी कसरत करावी लागली. खराब रस्त्यावरून व्हील चेअरही नेताना अडथळे येत होते. वृद्ध मतदारांनी विनंती करूनही वाहने कॉलेज आवारात नेण्यास मनाई करण्यात आल्याने वृद्ध मतदारांना त्रास सहन करावा लागला. सावेडी उपनगर परिसरात बहुतांश मतदान केंद्रांवर सकाळी आठ वाजेपासून मतदारांनी गर्दी करण्यास सुरू केली. सेंट मोनिका कॉलेज येथे साडेआठ वाजेच्या सुमारास काही वृद्ध मतदारांनी बंदोबस्तासाठी नियुक्त असलेल्या केंद्रीय सुरक्षा बलाच्या पोलिस कर्मचाऱ्यांना मतदान केंद्रापर्यंत सोडण्यासाठी वाहने आत नेऊ द्यावीत, अशी विनंती केली. मात्र, त्यांनी नकार दिल्याने वृद्ध मतदारांना खराब रस्त्यावरून कसरत करत मतदान केंद्रात पोहचावे लागले. तेथेही वृद्ध मतदारांना बसण्यासाठी व्यवस्था नसल्याने त्यांना रांगेत ताटकळत उभे राहावे लागले. मतदान केंद्र परिसरातून काही नागरिकांनी निवडणूक अधिकारी व पोलिस अधिकाऱ्यांना संपर्क साधून ही बाब निदर्शनास आणली. स्थानिक पोलिस अधिकारी केंद्रावर पोहोचल्यावर त्यांनीही रस्त्याची परिस्थिती पाहून वृद्ध मतदारांना केंद्रापर्यंत नेऊन सोडण्यासाठी वाहने आत नेण्यास परवानगी दिली. मतदारांना सोडल्यानंतर वाहने पुन्हा बाहेर नेण्यात आली. दरम्यान, निवडणूक अधिकारी सुधीर पाटील यांच्याशी संपर्क साधला असता, वृद्ध मतदारांसाठी व्हील चेअर उपलब्ध करण्यात आल्या आहेत, गरज पडल्यास आणखी उपलब्ध करून दिल्या जातील, निवडणूक आयोगाच्या निर्देशानुसार वाहने आत सोडता येणार नाहीत, असे स्पष्ट केले. सेंट मोनिका केंद्राकडे जाणाऱ्या रस्त्याची अवस्था. छाया : उदय जोशी