सेनगाव तालुक्यातील तीन स्वस्त धान्य दुकानदाराचे परवाने निलंबित:तहसीलदारांच्या अहवालानंतर जिल्हा पुरवठा अधिकाऱ्यांचे आदेश

सेनगाव तालुक्यातील तीन स्वस्त धान्य दुकानांच्या तपासणीमध्ये गंभीर स्वरुपाच्या त्रुटी आढळून आल्या असून या प्रकरणात सेनगाव तहसीलदारांनी सादर केलेल्या अहवालानंतर गोरेगाव येथील दोन तर बामणी येथील एक अशा तीन दुकानदारांचे स्वस्त धान्याचे परवाने निलंबित करण्यात आले आहे. याबाबतचे आदेश जिल्हा पुरवठा अधिकारी राजेश पुंजल यांनी नुकतेच काढले आहेत. सेनगाव तालुक्यामध्ये स्वस्त धान्य दुकानदारांकडून शिधापत्रिकाधारकांना मागील काही दिवसांत स्वस्त धान्याचे योग्य पध्दतीने वाटप होत नसल्याच्या तक्रारी सेनगाव तहसील कार्यालयाकडे प्राप्त झाल्या होत्या. या शिवाय सेनगाव पोलिसांनी काळ्याबाजारात जाणारे स्वस्त धान्य पकडून जप्त केले आहे. या प्रकरणी सेनगाव पोलिस ठाण्यात गुन्हे देखील दाखल झाले आहेत. या प्रकारानंतर जिल्हा प्रशासनाच्या वरिष्ठ अधिकाऱ्यांनी जिल्हयातील स्वस्त धान्य दुकानांची अचानक तपासणी करण्याच्या सूचना तहसील कार्यालयास दिल्या होत्या. त्यानुसार जिल्हाभरात तपासणी मोहिम हाती घेण्यात आली होती. वसमतचे तहसीलदार शारदा दळवी, सेनगावचे सखाराम मांडवगडे, औंढ्याचे हरिष गाडे, कळमनुरीचे जीवककुमार कांबळे तर हिंगोलीचे तहसीलदार श्रीकांत भुजबळ यांच्या पथकाने काही दुकानांना भेटी देऊन पाहणी केली होती. यामध्ये सेनगावचे तहसीलदार मांडवगडे यांनी गोरेगाव येथील देवकीनंदन महिला बचतगट व महेश महिला बचतगटाद्वारे चालविल्या जाणाऱ्या स्वस्त धान्य दुकानाला भेट देऊन पाहणी केली. यामध्ये दोन्ही दुकानामध्ये धान्याचा पुरवठा व धान्य वाटप यामध्ये तफावत आढळून आली तसेच दुकान सील केले असतांनाही धान्याचे वाटप झाल्याचे दिसून आले आहे. तर सदर दुकान महिला बचतगटाच्या नावे असतांना पुरुषच दुकान चालवित असल्याचे आढळून आले. तर बामणी येथेही धान्य पुरवठा व वाटपामध्ये तफावत आढळून आली. याबाबतचा अहवाल सेनगाव तहसीलदारांनी पाठवल्यानंतर तीनही दुकानांचे परवाने जिल्हा पुरवठा अधिकारी राजेश पुंजल यांनी निलंबीत केले आहे.