स्पर्धात्मक युगातला विद्यार्थी घडवणे महत्त्वाचे- शिक्षण राज्यमंत्री डॉ. भोयर:प्रभात स्कूलच्या "करिअर ऑन व्हिल्स’ या माहितीपूर्ण चित्ररथाचे उद्घाटन

स्पर्धात्मक युगातला सक्षम विद्यार्थी घडवण्याचे कार्य महत्त्वाचे आहे. यामुळे करिअर निवडीसाठी आवश्यक असा प्रभातने विकसित केलेला ‘करिअर ऑन व्हिल्स’ हा माहितीपूर्ण चित्ररथ विद्यार्थी, पालक व शिक्षकांसाठी दिशादर्शक आहे, असे प्रतिपादन राज्याचे शिक्षण राज्यमंत्री डॉ. पंकज भोयर यांनी केले. ते वाशीम रोडवरील प्रभात किड्स स्कूलमध्ये करिअर ऑन व्हिल्स या माहिती चित्ररथाचे आणि ट्रॅफिक पार्कचे उद्घाटन करताना बोलत होते. डॉ. भोयर पुढे म्हणाले की, मुख्यमंत्री माझी शाळा सुंदर शाळा टप्पा-२ स्पर्धेत संपूर्ण राज्यातून प्रथम क्रमांकाचे पारितोषिक प्राप्त केलेल्या प्रभात शाळेचा अभिमान वाटतो. प्रभात शैक्षणिकदृष्ट्या राबवत असलेले नावीन्यपूर्ण आणि अभिनव उपक्रम राज्यभर राबवण्याचा मानस आहे व त्याचे यशस्वी उपयोजन व्हावे, यासाठी प्रभातमध्ये संस्थाचालक आणि शिक्षकांसाठी प्रशिक्षण केंद्र सुरू व्हावे, त्यासाठी आम्ही त्यांना आवश्यक सहकार्य करू अशी ग्वाही त्यांनी यावेळी दिली. अध्यक्षस्थानी आ. वसंत खंडेलवाल होते. तर प्रमुख अतिथी म्हणून अमरावती विभागाचे शिक्षक आमदार अ‍ॅड. किरण सरनाईक, प्रभात किड्स स्कूलचे संचालक डॉ. गजानन नारे, संचालिका वंदना नारे, सदस्य अशोक ढेरे, सचिव नीरज आवंडेकर, मुख्याध्यापक वृषाली वाघमारे, व्यवस्थापक अभिजीत जोशी, शिक्षणाधिकारी डॉ. सुचिता पाटेकर उपस्थित होते. प्रास्ताविक प्रभातचे संचालक डॉ. गजानन नारे यांनी केले. पारंपरिक करिअरपेक्षा करिअरच्या आधुनिक युगाला योग्य अशा करिअरच्या व्यापक वाटा उपलब्ध आहेत. त्यांच्या जाणीव जागृतीसाठी करिअर ऑन व्हिल्स हा माहिती चित्ररथ आणि त्यातील बाबींचा तपशील यावेळी डॉ. गजानन नारे यांनी दिला. आ. अ‍ॅड. किरण सरनाईक यांनी करिअर ऑन व्हिल्स या नावीन्यपूर्ण उपक्रमाचे कौतुक केले. सूत्रसंचालन व आभार प्रदर्शन सांस्कृतिक विभागप्रमुख नंदकिशोर डंबाळे यांनी केले. ‘करिअर ऑन व्हिल्स’ या संदर्भात पारंपरिक ते अत्याधुनिक कृत्रिम बुद्धिमत्तापर्यंतच्या करिअरचा आशय दर्शवणारी मोठी रांगोळी प्रभातच्या शिक्षिका रुपाली अंबुसकर यांनी काढली होती. राज्यमंत्र्यांना अहवाल सादर प्रभात किड्स स्कूलचे संचालक डॉ. गजानन नारे यांनी ‘शिक्षण व्यवस्थेमध्ये काय सुधारणा केल्या पाहिजेत’, ‘करिअर ऑन व्हिल्स, आणि नवीन राष्ट्रीय शैक्षणिक धोरण-२०२० माहिती, आशय व उपयोजन’ या तीन अहवालांचे सादरीकरण शिक्षण राज्यमंत्री डॉ. पंकज भोयर यांना केले.