स्मार्ट बाजारच्या तळघरात आग:ग्राहकांमध्ये उडाली धावपळ; सुदैवाने जीवितहानी नाही

शहरातील मनमाड रस्त्यावरील स्मार्ट बाजार येथे सायंकाळी पावणे सहाच्या सुमारास तळघरात जाण्याच्या रस्त्यावर ठेवण्यात आलेल्या साहित्याला अचानक आग लागली. आगीची माहिती कळताच मॉलमधील ग्राहकांची धावपळ उडाली. सर्वांना सुखरूप बाहेर काढण्यात आले. आगीत कोणतीही जीवितहानी झालेली नाही. स्मार्ट बाजारच्या तळघरात जाण्याच्या रस्त्यावर मॉलमधील काही साहित्य ठेवण्यात आले होते. सायंकाळी पावणे सहाच्या सुमारास तळघराच्या बाजूने धूर येताना दिसताच कर्मचाऱ्यांनी तेथे धाव घेतली. महापालिकेच्या अग्निशमन दलाला माहिती मिळताच पथक घटनास्थळी दाखल झाले. अवघ्या १५ ते २० मिनिटांत पथकाने आग आटोक्यात आणली. तेथील कर्मचाऱ्यांनीही इतर साहित्य आगीपासून दूर केले. आग लागली असताना मॉलमध्ये ग्राहक होते. आगीची माहिती मिळताच व्यवस्थापनाने त्यांना बाहेर काढले. त्यामुळे आगीत जीवितहानी झाली नाही. किरकोळ साहित्याचे नुकसान झाले आहे.