30 वर्षांनंतर शिक्षकांसमवेत वर्गमित्र भेटले एकत्र:ताहाराबाद न्यू इंग्लिश स्कूलमध्ये स्नेहमेळावा

ताहाराबाद येथील न्यू इंग्लिश स्कूल व ज्युनिअर कॉलेजच्या १९९४-९५ च्या बॅचच्या माजी विद्यार्थ्यांचा स्नेहमेळावा ३० वर्षांनंतर झाला. कार्यक्रमाच्या अध्यक्षस्थानी सेवानिवृत्त शिक्षिका अनुसया पाटील होत्या. कार्यक्रमाची सुरुवात प्रार्थना व राष्ट्रगीताने झाली. माता सरस्वती, छत्रपती शिवाजी महाराज यांच्या पुतळ्याला पुष्पहार अर्पण करण्यात आला. प्रास्ताविक सटाणा मर्चंट बँकेचे संचालक सचिन कोठावदे यांनी केले. यावेळी व्यासपीठावर शिक्षक टी. के. भामरे, एम. पी. भामरे, एम. डी. नंदन, पी. एन. बेडीस यांच्यासह विद्यार्थ्यांपैकी नामपूर कृषी उत्पन्न बाजार समितीचे माजी सभापती शांताराम निकम, ताहाराबादचे माजी सरपंच संदीप साळवे, विस्तार अधिकारी विशाल सूर्यवंशी, योगिता सोनवणे, चंद्रकला पाटील यांनी मार्गदर्शन केले. समाजातील विविध क्षेत्रांत विशेष नैपुण्य मिळविलेल्या विद्यार्थ्यांचा गुरुजनांच्या हस्ते सपत्नीक सत्कार करण्यात आला. कार्यक्रमास ताहाराबादच्या सरपंच शीतल नंदन, वैशाली पाटील उपस्थित होते. सूत्रसंचालन प्रवीण सोनवणे यांनी केले. स्नेहमेळाव्यात भेटलेले वर्गमित्र आता विविध क्षेत्रात कार्यरत आहेत. स्नेहमिलन कार्यक्रमाच्या निमित्ताने भेटल्यानंतर प्रत्येकाच्या चेहऱ्यावर आनंद होता. सर्वांनी मनसोक्त चर्चा करून जुन्या आठवणींना उजाळा दिला.