Beed Crime: केज तालुक्यातील तांबवा जवळील विठ्ठल वस्तीसह कोल्हे वस्तीवर घरफोडी

केज : केज तालुक्यातील तांबवा गावा जवळ असलेल्या विठ्ठल वस्ती आणि कोल्हे वस्तीवर घरी कोणी नसल्याची संधी चोरट्यांनी घराचे कुलूप तोडून घरात प्रवेश करीत कपाट व पेटीतील रोख रक्कमेसह दागिने लंपास केल्याची घटना सोमवारी दुपारी घडली.

केज शहरापासून जवळ असलेल्या कोल्हेवस्ती येथे वास्तव्यास असलेले नागेश चंद्रकांत कोल्हे हे सोमवारी सकाळी नातेवाईकांच्या अंत्यसंस्कारासाठी वाशी (जि. धाराशिव) येथे गेले होते. त्यांची पत्नी ही घराला कुलूप लावून शेतात गेली होती. दुपारी ३:९० वाजेच्या सुमारास घरी कोणी नसल्याची संधी साधून चोरट्यांनी घराचे कुलूप तोडून घरात प्रवेश केला. घराची झडती घेत कपाट तोडून कपाटातील दीड तोळ्याचे सोन्याचे कानातील झुंबर घेऊन पोबारा केला.

त्याच बरोबर कोल्हेवस्ती पासून २ किमी अंतरावर तांबवा येथील विठ्ठल वस्तीवर वास्तव्यास असलेले नवनाथ भगवान चाटे हे सोमवारी सकाळी घराला कुलूप लावून शेतात गेले होते. पाठीमागे चोरट्यांनी घरी कोणीच नसल्याची संधी साधून त्यांच्या घराचे कुलूप तोडून घरात प्रवेश केला. घराची झडती घेत पेटी तोडून पेटीतील पट्टी गंठण व इतर दागिने, रोख रक्कम १० हजार रुपये असा ऐवज घेऊन पोबारा केला.