जप्त केलेला वाळूचा ट्रक तहसील कार्यालयातून चोरला:मालकाविरोधात गुन्हा, चोरट्यासह ट्रक अमरावतीतून ताब्यात

अवैध व्यवहारामुळे जप्त करण्यात आलेला वाळूचा ट्रक त्या वाहनाच्या मालकाने चक्क येथील तहसील कार्यालयाच्या परिसरातून चोरुन नेला. दरम्यान या खळबळजनक घटनेनंतर महसूल आणि पोलिस ही दोन्ही खाती खडबळून जागी झाली. त्यानंतर पोलिसांनी शोध मोहीम राबवून चोरट्यासह ट्रकला अमरावतीतून ताब्यात घेतले. पोलिसांनी दिलेल्या माहितीनुसार सदर ट्रक तहसील कार्यालयातून पळविणारा मालक पोलिसांच्या ताब्यात आला आहे. महसुल प्रशासनाने हा ट्रक अवैध रेती वाहतूक प्रकरणी काही दिवसांपूर्वी ताब्यात घेतला होता. मंडळ अधिकारी अमोल बोकडे यांनी तो जप्त करुन तहसील कार्यालय परिसरात ठेवला होता. दरम्यानच्या काळात अमरावती येथील ट्रक मालक अब्दुल वाहिद अब्दुल अनिस कादर यांनी हा ट्रक तहसील कार्यालयाच्या परिसरातून लंपास केला. ही बाब निर्दशनास येताच महसूल विभागाने अचलपूर पोलिसांत तक्रार दिली. त्यानंतर हा ट्रक पुन्हा जप्त करत मालकाला ताब्यात घेण्यात आले.अचलपूर येथील मंडळ अधिकारी अमोल बोकडे यांनी ६ ब्रास वाळू वाहतूक करताना ट्रक ताब्यात घेत चालक मो.आरिफ मो शाबीर याला समज देत ट्रक तहसील कार्यालयात उभा केला होता. दरम्यान १० नोव्हेंबर रोजी तो चोरीला गेल्याची बाब निर्दशनास आली. त्यानंतर पोलिसांत तक्रार देण्यात आली. त्या तक्रारीनंतर हा ट्रक अचलपूर पोलिसांनी तत्काळ शोध घेत मालकासह ताब्यात घेतला.