Leopard Attack: बिबट्याच्या हल्ल्यात चिमुकल्याचा मृत्यू; मांडवगण फराटा येथील दुर्दैवी घटना

मांडवगण फराटा (ता. शिरूर) येथील टेंभेकरवस्ती येथे घराच्या अंगणात खेळत असलेल्या चिमुकल्याला बिबट्याने अचानक हल्ला करत उचलून नेले. या घटनेत चिमुकल्याचा दुर्दैवी मृत्यू झाला. शिवतेज टेंभेकर (वय 4) असे मृत्यू झालेल्या चिमुकल्याचे नाव आहे. एक महिन्यापूर्वी याच भागात गोकुळनगर येथे बिबट्याच्या हल्ल्यात मुलाचा मृत्यू झाला होता. ही दुसरी घटना घडल्याने परिसरात ग्रामस्थ आक्रमक झाले आहेत.

याबाबत मिळालेल्या माहितीनुसार, शुक्रवारी (दि. 15) सायंकाळी 7 वाजेच्या सुमारास शिवतेज हा अंगणात खेळत होता. सायंकाळच्या सुमारास या वस्तीवर वीजपुरवठा नव्हता. या वेळी अचानक बिबट्याने अंगणात येत चिमुकल्यावर हल्ला करत उचलून नेले. ही घटना घडल्यानंतर कुटुंबीयांनी आरडाओरड केली.

यानंतर स्थानिकांनी मुलाचा शोध घेण्याचा प्रयत्न सुरू केला. अखेर मोठ्या प्रयत्नानंतर मुलाला शोधण्यात यश आले. मुलावर गंभीर हल्ला झाल्याने त्याचा जागीच मृत्यू झाला. घटना घडल्यानंतर सुमारे एक तासाने वनविभाग जागे झाला. वनविभागाचे अधिकारी दाखल होताच स्थानिकांनी त्यांना घेराव घातला.